BAKI,AzerVoice
Səudiyyə Ərəbistanının İxracın İnkişafı Təşkilatı (Saudi Exports) Səudiyyə-İraq Koordinasiya Şurası ilə əməkdaşlıq çərçivəsində Bağdad Beynəlxalq Sərgisində iştirak edir. AzerVoice xəbər verir ki, Səudiyyə pavilyonunda müxtəlif ixrac sektorlarını təmsil edən 55 milli şirkət yer alır.
Fevralın 1-dən 7-dək İraqın paytaxtı Bağdadda keçirilən sərgi Səudiyyə Ərəbistanı ilə İraq arasında ticarət əlaqələrini gücləndirmək və Krallığın aparıcı məhsul və xidmətlərini tanıtmaq üçün dəyərli bir fürsət yaradır.
Səudiyyə İxracat Təşkilatının sərgidə iştirakı milli məhsulların beynəlxalq bazarlardakı mövqeyini gücləndirmək, ticarət tərəfdaşlıqlarını genişləndirmək və Səudiyyə ixracatının rəqabətqabiliyyətliliyini, keyfiyyətini və səmərəliliyini artırmaöı hədəfləyir.
Səudiyyə İxracat Təşkilatının baş direktoru Əbdülrəhman Əl-Suqeyr Səudiyyə Ərəbistanının sərgidə iştirakının qonşu ölkələrlə, xüsusilə İraqla ticarət əlaqələrini dərinləşdirmək əzmini nümayiş etdirdiyini bildirib. O, "Jeerah və Deerah" şüarının iki ölkə arasında mövcud olan möhkəm tarixi və qardaşlıq əlaqələrini simvolizə etdiyini və Səudiyyə məhsullarının bölgədəki mövqeyini daha da gücləndirdiyini vurğulayıb.
Qeyd edək ki, 2020-2024 cü illərdə Səudiyyənin İraqa qeyri-neft ixracatı təxminən 20 milyard Səudiyyə riyalına çatıb. Bu dövrdə metallar və onların məhsulları, qida sənayesi, elektrik avadanlıqları və maşınqayırma ən çox ixrac olunan sektorlar olub.