BAKI, VOA, Orxan Qədirzadə

İsrail tərəfi İranın hərbi proqramlarında mühüm rol oynayan iki yüksək rütbəli alimin – Məhəmməd Əli Xudabaxş və Məhəmməd Rizanın öldürüldüyü barədə hesabat yayıb. İddialara görə, sözügedən şəxslər Tehranın gizli elektromaqnit silahlarının hazırlanmasına rəhbərlik ediblər.

VOA xəbər verir ki, İsrailin "Channel 12" telekanalı, həmçinin "Yedioth Ahronoth" və "The Jerusalem Post" nəşrləri öz mənbələrinə istinadən alimlərin Tehran ətrafında avtomobillərinə endirilən dəqiq zərbə nəticəsində həlak olduqlarını bildiriblər. İsrail tərəfi hədəfə tam nail olunduğunu və hər iki mütəxəssisin öldüyünü iddia edir.

İranın "Tasnim" agentliyi müdafiə qurumunun "iki texniki mütəxəssisinin" həlak olması ilə nəticələnən hadisəni təsdiqləsə də, rəsmi Tehran hələlik həlak olanların şəxsiyyətini və onların konkret elmi layihələrdəki iştirakını rəsmən təsdiq etməyib. İsrail mediasının versiyasına görə, hücumun əsas səbəbi alimlərin elektromaqnit impulsu (EMİ) sahəsindəki fəaliyyətləri olub. ABŞ-ın FDD mərkəzinin analitikləri ehtimal edirlər ki, Xudabaxş və Riza elektronika və hava hücumundan müdafiə sistemlərini məsafədən sıradan çıxara bilən texnologiyalar üzərində çalışırmışlar.

Qeyd edək ki, fevralın 28-dən başlayan genişmiqyaslı hərbi eskalasiya nəticəsində, İran rəsmilərinin məlumatına görə, ABŞ və İsrail koalisiyasının zərbələri qurbanlarının sayı artıq 1 348 nəfəri ötüb. Belə yüksək səviyyəli mütəxəssislərin itirilməsi, təsdiqlənəcəyi təqdirdə, hərbi qarşıdurmanın qızğın vaxtında ölkənin elmi-texniki proqramlarını ciddi şəkildə ləngidə bilər.