BAKI,VOA

İqtisadiyyat naziri Mikayıl Cabbarov və İslam İnkişaf Bankı Qrupunun sədri Məhəmməd Əl-Casirinin rəhbərlik etdiyi nümayəndə heyəti Qarabağa səfər edib. Səfər çərçivəsində Ağdam, Füzuli, Xocavənd, Şuşa və Xankəndidə həyata keçirilən bərpa-quruculuq və infrastruktur layihələri ilə tanışlıq olub.

VOA xəbər verir ki, nümayəndə heyətinə Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəsi Emin Hüseynov bölgədə aparılan yenidənqurma işləri və infrastruktur layihələri barədə məlumat verib.

Səfər çərçivəsində qonaqlar Ağdam Sənaye Parkında fəaliyyət göstərən müəssisələrdə istehsal prosesi ilə tanış olublar. Sahibkarlarla keçirilən görüşdə istehsal potensialının artırılması, ixracyönümlü inkişaf perspektivləri və İslam İnkişaf Bankı ilə əməkdaşlıq imkanları müzakirə edilib.

Bildirilib ki, 190 hektar ərazini əhatə edən Ağdam Sənaye Parkının 70 faizdən çox hissəsi artıq sahibkarların istifadəsinə verilib. Rezidentlərə vergi və gömrük güzəştlərinin tətbiq olunduğu qeyd edilib.

Nümayəndə heyəti Füzuli şəhərində Kurmanqazı adına Uşaq Yaradıcılıq Mərkəzi, 1 saylı körpələr evi-uşaq bağçası və Mirzə Uluqbəy adına məktəbdə yaradılan müasir təhsil infrastrukturu ilə də tanış olub.

Şuşaya səfər zamanı qonaqlara şəhərdə aparılan bərpa-quruculuq işləri barədə məlumat verilib, tarixi-mədəni abidələr ziyarət olunub.

Xankəndidə yerləşən Qarabağ Universitetində olan nümayəndə heyəti burada yaradılmış müasir tədris infrastrukturu və akademik mühitlə tanış olub. Qeyd edilib ki, universitet regionun sosial-iqtisadi inkişafı üçün yüksəkixtisaslı kadrların hazırlanmasında mühüm rol oynayacaq.

Səfər zamanı işğaldan azad edilmiş ərazilərdə yaradılan müasir infrastruktur və əlverişli investisiya mühitinin regionun sosial-iqtisadi inkişafına mühüm töhfə verdiyi vurğulanıb.