Bakı, AzerVoice

“Bu ilin sentyabrında Əlahəzrət Şeyx Məhəmməd bin Zayed Əl Nəhyanın Qarabağa tarixi səfəri bizim dostluğumuzu, həmrəyliyimizi və strateji tərəfdaşlığımızı əyani şəkildə nümayiş etdirdi. Səfər zamanı əməkdaşlığımızı yeni mərhələyə qaldıran bir sıra mühüm sənədlər imzalanıb, Azərbaycan ilə Birləşmiş Ərəb Əmirlikləri (BƏƏ) arasında hərtərəfli strateji tərəfdaşlıq münasibətləri haqqında Birgə Bəyannamə xüsusi əhəmiyyət kəsb edən sənədə çevrilib”.

AzerVoice xəbər verir ki, bu fikirləri Bakıda BƏƏ-nin Müstəqillik Günü ilə bağlı keçirilən tədbirdə Azərbaycanın iqtisadiyyat naziri Mikayıl Cabbarov deyib.

O, bildirib ki, iki ölkə arasında bütün sahələrdə, o cümlədən iqtisadi-ticari sahədə əməkdaşlıq uğurla davam edir və hər iki ölkə bu münasibətləri inkişaf etdirmək niyyətindədir.

“İnvestisiya sahəsində əməkdaşlığımız xüsusi əhəmiyyət kəsb edir. 1 milyard ABŞ dolları maliyyə imkanlarına malik Birgə İnvestisiya Fondu bu baxımdan əsas alətlərdən biridir. Hazırda Fond çərçivəsində bir sıra investisiya layihələri üzrə danışıqlar aparılır. Bu ilin sentyabrında Bakıda keçirilən Birinci Azərbaycan Beynəlxalq İnvestisiya Forumu zamanı “Modon Holding” ilə şəhərsalma üzrə 5 milyard dollarlıq investisiya layihəsi üzrə əməkdaşlıq sazişi imzalanıb. Neft və qaz sektorunda tərəfdaşlığımız SOCAR və ADNOC arasında uğurlu əməkdaşlıq sayəsində inkişaf etməkdə davam edir. Eyni zamanda, yeni layihələrə əməkdaşlığa marağın artdığını müşahidə edirik. BƏƏ-dən olan şirkətlər Azərbaycanda bərpaolunan enerji layihələrində strateji tərəfdaş və əsas investor kimi çıxış edirlər. Ölkəmizdə istifadəyə verilən ilk Günəş elektrik stansiyasının tikintisi Birləşmiş Ərəb Əmirliklərinin dəstəyi ilə həyata keçirilib. Digər tərəfdən, ticarət və investisiya əlaqələrini genişləndirmək məqsədilə Birgə İşgüzar Şuranın yaradılmasını planlaşdırırıq. Bu yeni institusional mexanizm biznes icmalarımız arasında əməkdaşlığı daha da yüksək səviyyəyə qaldırmağa kömək edəcək”, - deyə M.Cabbarov əlavə edib.