BAKI,VOA
İranın idman naziri bildirib ki, FİFA ölkəsinin oyunlarını Amerika Birləşmiş Ştatlarından Meksikaya köçürməyəcəyi təqdirdə, milli komanda qarşıdan gələn Dünya Çempionatında iştirakı qeyri-müəyyən olaraq qalacaq.
VOA xəbər verir ki, İdman naziri Əhməd Dünyamali bazar günü Türkiyənin "Anadolu" agentliyinə verdiyi müsahibədə İran Futbol Federasiyasının (IFF) oyunların yerinin dəyişdirilməsi ilə bağlı ali futbol qurumuna müraciət etdiyini, lakin hələlik cavab almadıqlarını deyib.
"Əgər FİFA-ya etdiyimiz müraciət qəbul olunarsa, İranın Dünya Çempionatında iştirakı dəqiq olacaq", - deyə Dünyamali bildirib.
İyun və iyul aylarında Kanada və Meksika ilə birlikdə turnirə ev sahibliyi edəcək ABŞ, fevralın 28-dən etibarən İsrail ilə birlikdə İrana qarşı hərbi əməliyyatlara başlayıb və bu, Yaxın Şərqdə genişmiqyaslı münaqişəyə səbəb olub. Tehran isə buna cavab olaraq İsrailə, ABŞ qüvvələrinin yerləşdiyi hərbi bazalara və Körfəz infrastrukturuna raket və dron zərbələri endirib.
Asiyadan Dünya Çempionatına vəsiqə qazanan ilk komanda olan İranın bütün qrup oyunları ABŞ-ın Qərb sahilində keçirilməlidir.
Trampın açıqlaması və İranın reaksiyası
Müharibənin başlamasından iki həftə sonra ABŞ Prezidenti Donald Tramp bildirmişdi ki, iranlılar oyunlar üçün ölkəsinə gələ bilərlər, lakin əlavə etmişdi ki, onların öz həyatı və təhlükəsizliyi üçün orada olmalarının münasib olduğuna inanmır.
Buna cavab olaraq İranın futbol komandası sosial mediada "heç kim İran millisini Dünya Çempionatından kənarlaşdıra bilməz" bəyanatını yayıb. İran futbolunun rəhbəri Mehdi Tac isə əlavə edib ki, : "Tramp İran millisinin təhlükəsizliyini təmin edə bilməyəcəyini açıq şəkildə bildirdikdən sonra biz qətiyyən Amerikaya getməyəcəyik. Hazırda oyunların Meksikada keçirilməsi üçün FİFA ilə danışıqlar aparırıq".
Lakin bir neçə gün sonra FİFA İranın müraciətini rədd edərək, bütün oyunların ötən il açıqlanan təqvimə uyğun keçiriləcəyini bildirib. FİFA prezidenti Canni İnfantino köçürülmə variantının masada olmadığını təsdiqləyərək, "Oyunlar püşkatmaya əsasən harada keçirilməlidirsə, orada da oynanılacaq".-deyib.