BAKI, VOA

Avropanın klublar səviyyəsində bir nömrəli turniri olan UEFA Çempionlar Liqasında 1/8 final mərhələsinin püşkatma mərasimi İsveçrənin Nion şəhərində, UEFA-nın mənzil-qərargahında keçirilib.

VOA xəbər verir ki, Tanınmış sabiq xorvat futbolçu İvan Rakitiçin iştirakı ilə reallaşan püşkatma nəticəsində "Qalatasaray"ın bu mərhələdəki rəqibi İngiltərə təmsilçisi "Liverpul" olub.

Püşkə əsasən, "sarı-qırmızılılar" ilk oyunu öz meydanında — "Rams Park"da keçirəcək, cavab matçı isə səfərdə oynanılacaq. Çempionlar Liqasında 1/8 finalın ilk oyunları 10-11 mart, cavab qarşılaşmaları isə 17-18 mart tarixlərində baş tutacaq. Cari mövsümün final matçı isə 30 may 2026-cı ildə Macarıstanın paytaxtı Budapeştdəki "Puşkaş Arena"da keçiriləcək.

Maraqlıdır ki, "Qalatasaray" və "Liverpul" cari mövsümün liqa mərhələsində də bir-birinə rəqib olublar. İstanbulda, "Rams Park"da baş tutan həmin görüşdə Türkiyə təmsilçisi rəqibini 1:0 hesabı ilə məğlub etməyi bacarmışdı. Azarkeşlər indi İstanbul klubunun bu uğuru 1/8 final mərhələsində də təkrarlayaraq növbəti mərhələyə adlayacağını gözləyirlər.