BAKI,VOA, Fərid Mikayılov

Meksikada kartel rəhbərinin hərbi əməliyyat zamanı öldürülməsindən sonra yaranan təhlükəsizlik böhranı səbəbindən bir sıra futbol oyunları təxirə salınıb.

VOA xəbər verir ki, hadisədən sonra ölkənin bir neçə ştatında silahlı insidentlər və yol blokadaları qeydə alınıb.

Yaranmış vəziyyət fonunda Liga MX çərçivəsində keçirilməsi planlaşdırılan dörd peşəkar oyun təxirə salınıb.

Keretaro – Xuares qarşılaşması ləğv edilib, həmçinin qadınlar liqasında prinsipial Çivas – Amerika oyunu da qeyri-müəyyən vaxta keçirilib. İkinci divizionda nəzərdə tutulan iki görüş də təhlükəsizlik səbəbilə baş tutmayıb.

Kartel üzvlərinin müxtəlif ştatlarda avtomobilləri yandırması və əsas magistral yolları bağlaması nəqliyyat əlaqələrini iflic vəziyyətinə salıb. Bu cür “narkoblokadalar” təhlükəsizlik qüvvələrinin hərəkətini məhdudlaşdırmaq məqsədi daşıyır.

Hadisələrin baş verdiyi ərazi 2026-cı il dünya çempionatına ev sahibliyi edəcək əsas şəhərlərdən biri olan Quadalaxaraya cəmi iki saatlıq məsafədə yerləşir. Şəhərin turnir çərçivəsində dörd oyuna ev sahibliyi etməsi planlaşdırılır.

Turnirin təşkilatçısı FIFA tərəfindən rəsmi narahatlıq ifadə olunmasa da, təhlükəsizlik məsələsi diqqət mərkəzindədir.

Bununla yanaşı, Akapulkoda keçirilən Meksika Açıq tennis turnirinin plan üzrə start götürəcəyi bildirilib. Təşkilatçılar yarışın normal rejimdə davam etdiyini açıqlayıblar.

Meksika millisinin İslandiya ilə yoldaşlıq oyununun keçirilib-keçirilməyəcəyi isə hələlik açıqlanmayıb.