BAKI, AzerVoice, Səməd Əyyubov

Avstraliyalı pilot, “Mclaren” komandasının üzvü Oskar Piastri 2025-ci il mövsümünün Formula-1 dünya çempionatının 15-ci mərhələsi olan Niderland Qran-prisinin qalibi olub.

AzerVoice xəbər verir ki, yarışlar Zandfort avtodromunda keçirilib.

İkinci yeri Niderlandı təmsil edən və “Red Bull” komandasının pilotu Maks Ferstappen tutub. İlk üçlüyü isə “Racing Bulls” komandasının fransalı sürücüsü İsak Hacar tamamlayıb. Bu, onun “Formula-1”də debüt mövsümündə ilk podium uğuru olub.

Ümumi pilotlar siyahısında ikinci yerdə olan britaniyalı Lando Norris güc qurğusunda yaranan problemə görə yarışı başa vura bilməyib. O, 65-ci dövrədə, Piastrinin arxasında gedərkən mübarizəni dayandırmalı olub.

Hazırda Piastri 309 xalla pilotların ümumi sıralamasına başçılıq edir. İlk üçlüyə həmçinin Norris (275 xal) və Ferstappen (205 xal) daxildir. Konstruktorlar Kubokunda isə “Mclaren” 584 xalla birinci yerdə qərarlaşıb. Onu “Ferrari” (260 xal) və “Mercedes” (248 xal) izləyir. Hər iki “Ferrari” pilotu Niderland Qran-prisini başa vura bilməyib.

Qeyd edək ki, növbəti mərhələ 5–7 sentyabr tarixlərində İtaliyanın Monza avtodromunda keçiriləcək.