BAKI,VOA Orxan Qədirzadə
Şamaxı rayonunun Qızmeydan kəndində “Elləroyuğu” Yaylaq Festivalı keçirilib. Amasiya rayonu Elləroyuğu kənd İcmasının təşkilatçılığı ilə baş tutan festival Qərbi Azərbaycanın zəngin tarixi-mədəni irsinin, xüsusilə Ağbaba-Şörəyel mahalının milli-mənəvi dəyərlərinin yaşadılması və gələcək nəsillərə ötürülməsi məqsədilə təşkil olunub.
VOA xəbər verir ki, tədbir çərçivəsində ilk olaraq mahalın tarixi yaddaşını, qədim toponimlərini, yurd yerlərini və milli adət-ənənələrini əks etdirən “Kəndimizin tarixi yaddaşı” adlı sərgi nümayiş etdirilib. Sərgiyə baxış zamanı iştirakçılar Ağbaba-Şörəyel mahalının tarixi keçmişi, mədəni irsi və milli dəyərləri ilə yaxından tanış olublar.
Festival iştirakçılarına bildirilib ki, Ağbaba-Şörəyel mahalı Azərbaycanın tarixi-coğrafi məkanının ayrılmaz hissələrindən biridir və qədim Oğuz-türk mədəniyyətinin mühüm mərkəzlərindən sayılır. Qeyd olunub ki, bölgənin mədəni simasının formalaşmasında Ağbaba-Çıldır aşıq mühiti mühüm rol oynayıb. Bu mühit əsrlər boyu xalqın milli kimliyinin, mənəvi dəyərlərinin və tarixi yaddaşının qorunaraq gələcək nəsillərə çatdırılmasına xidmət edib.
Festival çərçivəsində Ağbaba-Çıldır aşıq mühitinin görkəmli nümayəndəsi, saz-söz sənətinin tanınmış ustadı Aşıq İsgəndər Ağbabalının anadan olmasının 100 illik yubileyi də qeyd olunub.
Tədbirdə çıxış edən Amasiya Rayon İcmasının sədri, akademik, Əməkdar elm xadimi Abel Məhərrəmov festivalın milli yaddaşın yaşadılması, mədəni irsin qorunması və gələcək nəsillərə ötürülməsi baxımından mühüm əhəmiyyət daşıdığını vurğulayıb. O bildirib ki, bu cür təşəbbüslər Qərbi Azərbaycan irsinin təbliği və Böyük Qayıdış ideyasının təşviqi istiqamətində mühüm rol oynayır.
Daha sonra çıxış edən Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərli Ağbaba-Şörəyel mahalının zəngin tarixi-mədəni irsinin qorunmasının və gələcək nəsillərə çatdırılmasının mühüm vəzifələrdən biri olduğunu bildirib. Onun sözlərinə görə, bu kimi tədbirlər milli yaddaşın yaşadılmasına, Qərbi Azərbaycan həqiqətlərinin geniş təbliğinə və doğma yurd yerlərinə bağlılığın möhkəmləndirilməsinə xidmət edir.
Festivalda çıxış edən Tahir Məmmədov, Hikmət Babaoğlu, Mahirə Hüseynova, Vahid Novruzov, Məhərrəm Qasımlı və Avtandil Ağbaba Ağbaba-Çıldır aşıq məktəbinin Azərbaycan mədəniyyətində tutduğu xüsusi mövqedən, bu irsin qorunmasının əhəmiyyətindən danışıblar.
Festivalın rəsmi hissəsində Qərbi Azərbaycan İcmasının sıralarına yeni qəbul olunan üzvlərə üzvlük vəsiqələri və döş nişanları təqdim edilib. Həmçinin İcmanın fəaliyyətində fəallıq göstərən bir qrup şəxs təşəkkürnamələrlə təltif olunub.
Tədbirin davamında şair-publisist Şəmsi Qoca və şair İmran Güllübulaqlı tərəfindən el-obaya həsr olunan şeirlər əsasında bəstələnmiş mahnılar səsləndirilib. İştirakçılara Şəmsi Qocanın müəllifi olduğu “Əsrin saz yaddaşı: Aşıq İsgəndər Ağbabalı” monoqrafiyası, həmçinin alimlərin, tədqiqatçıların və şairlərin məqalə və şeirlərindən ibarət “Aşıq İsgəndər Ağbabalı – 100” kitabı hədiyyə olunub.
Festivalın bədii hissəsində el sənətkarları Qəşəm İsaoğlu, Telman Gülsehran və Naib çıxış ediblər. Gənclər və ağsaqqalların birgə ifa etdikləri Ağbaba yallısı tədbir iştirakçıları tərəfindən böyük maraq və alqışla qarşılanıb.
Kənd sakinləri çıxışlarında festivalın yüksək səviyyədə təşkil olunmasına görə akademik Abel Məhərrəmova və Şamaxı Rayon İcra Hakimiyyətinin başçısı Tahir Məmmədova təşəkkürlərini bildiriblər. Aşıq İsgəndər Ağbabalının ailəsi adından çıxış edən Faxfur Gülməmmədov atasının xatirəsinə göstərilən ehtirama görə təşkilatçılara və qonaqlara minnətdarlığını ifadə edib.
Tədbirin sonunda vurğulanıb ki, “Elləroyuğu” Yaylaq Festivalı Ağbaba-Şörəyel mahalının tarixi yaddaşının yaşadılması, milli-mədəni irsin qorunması və gələcək nəsillərə ötürülməsi istiqamətində mühüm əhəmiyyət daşıyan tədbirlərdən biri kimi yadda qalacaq. Festival həmçinin Qərbi Azərbaycan irsinin təbliği, milli kimliyin möhkəmləndirilməsi və mədəni dəyərlərin yaşadılması baxımından əlamətdar hadisə kimi qiymətləndirilib.
