Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi tərəfindən bu ilin ötən dövrü ərzində 1336 işsiz və işaxtaran şəxs əmək bazarının tələblərinə uyğun peşə hazırlığı kurslarına cəlb olunub.
AzerVoice xəbər verir ki, kurslar həm dövlət, həm də özəl tədris müəssisələrində təşkil edilib.
Məlumata görə, müdavimlərdən 525 nəfəri Agentliyin Bakı, Gəncə, Göyçay, Qarabağ və Naxçıvan Peşə Hazırlığı Mərkəzlərində təhsil alır. Daha 811 nəfər isə müvafiq istiqamətlər üzrə özəl tədris müəssisələrində kurslara cəlb edilib.
Kurslar əsasən müasir əmək bazarında tələbatın yüksək olduğu aşağıdakı sahələri əhatə edir:
Texnologiya və Maliyyə: Frontend developer, mühasib, insan resursları mütəxəssisi;
Xidmət və İstehsalat: Dərzi, yanacaqdoldurma stansiyası operatoru, təchizat üzrə agent və kompüter operatoru.
İşəgötürənlərlə sıx əməkdaşlıq çərçivəsində təşkil olunan bu kurslarda müdavimlər həm nəzəri, həm də praktiki biliklərə yiyələnirlər. Proqramı uğurla başa vuran şəxslərin müvafiq vakansiyalar üzrə işlə təminatı da Agentlik tərəfindən həyata keçirilir.
