BAKI, VOA

Pakistanın informasiya naziri Ataullah Tarar Qətərin Əl-Cəzirə telekanalına verdiyi müsahibədə rəsmi İslamabadın bölgədəki hərbi eskalasiya ilə bağlı mövqeyini açıqlayıb.

VOA xəbər verir ki, nazir Pakistanın İranla gərginliyi azaltmağa hazır olduğunu və tərəflər arasında vasitəçilik missiyasını üzərinə götürə biləcəyini bəyan edib.

Ataullah Tarar müsahibəsində Pakistan hökumətinin regional təhlükəsizlik və diplomatik səyləri ilə bağlı bir neçə mühüm mesaj verib.

Nazir Pakistanın regionda sülhün tərəfdarı olduğunu vurğulayaraq bildirib ki, : "Pakistan gərginliyin azaldılmasına töhfə vermək istəyir. İrana qarşı həyata keçirilən hərbi hücumları pisləyirik və eyni zamanda Körfəz ölkələri ilə həmrəy olduğumuzu ifadə edirik." O, tərəfləri hərbi əməliyyatları dayandırmağa və gərginliyi azaltmağa çağırıb.

Pakistanın diplomatik potensialına toxunan Tarar, İslamabadın tərəflər arasında "körpü" rolunu oynaya biləcəyini qeyd edib.
"Biz vasitəçilik rolunu oynamağa hazırıq. Əvvəllər də bu missiyanı yerinə yetirmişik və uğur qazanmışıq. İndi də bu istiqamətdə töhfə verməyə tam hazırıq."-deyə o bildirib.

Qeyd edək ki, Pakistanın bu təklifi ABŞ və İsrailin İrana qarşı hərbi əməliyyatlarının genişləndiyi, eyni zamanda Pakistan və Əfqanıstan sərhədində gərginliyin artdığı bir dövrə təsadüf edir. İslamabad bu addımı ilə regionda tarazlıq yaratmağa və böyük bir müharibənin qarşısını almağa çalışdığını nümayiş etdirir.