BAKI, VOA, Orxan Qədirzadə
Səudiyyə Ərəbistanı Krallığının vətəndaşları 15 fevral 2026-cı il tarixindən etibarən Azərbaycan Respublikasına vizasız gəliş hüququ əldə ediblər.
VOA xəbər verir ki, Səudiyyə Ərəbistanı Xarici İşlər Nazirliyinin məlumatına əsasən, bu qərar adi pasport sahiblərinə şamil olunur və 15 fevral 2027-ci il tarixinədək qüvvədə qalacaq.
Yeni qaydalara görə, güzəşt müddəti ərzində Səudiyyə Ərəbistanı vətəndaşları Azərbaycana viza almadan üç dəfə giriş edə bilərlər. Hər giriş zamanı ölkə ərazisində qalma müddəti 30 günə qədər müəyyən edilib. Bu qərarın iki ölkə arasında həm turizm, həm də biznes əlaqələrinin daha da genişlənməsinə stimul verəcəyi gözlənilir.
Qeyd edək ki, viza azadlığı ilə bağlı rəsmi elan 20 fevral 2026-cı il (hicri təqvimlə 3 ramazan 1447-ci il) tarixində yayımlanıb. Bu addım Azərbaycanın beynəlxalq əməkdaşlıq və strateji tərəfdaşlıq kursuna uyğun olaraq, gediş-gəliş prosedurlarının sadələşdirilməsi siyasətinin tərkib hissəsidir.