Bakı. AzerPress:

Doğma Azərbaycan xalqına göstərilən yardım təşkilatında iştirakdan məmnunam. Minaların təmizlənməsi məsələsində biz köməkliyimizi göstəririk.

AzerPress xəbər verir ki, bunu Səudiyyə Ərəbistanı Krallığının Azərbaycan Respublikasındakı fövqəladə və səlahiyyətli səfiri Essam bin Saleh Algetal jurnalistlərə müsahibəsində bildirib.

Səfir iki ölkə arasında inkişafı nəzərdə tutulan digər sahələrə də toxunub:

"Bu layihələr bir boşluqdan irəli gəlməyib, bu, iki müqəddəs məscidin xadimi və onun vəliəhdinin tapşırığı əsasında yerinə yetirilir. Hansı ki, onların hər ikisinin Azərbaycan Respublikasının cənab Prezidentinə və Azərbaycan xalqına böyük hörmətləri var. Və Səudiyyə Ərəbistanın bu layihədə iştirakı iki ölkə arasında dərin əlaqərin olmasının sübutudur.

Biz bir neçə sahələrdə Azərbaycanla əməkdaşlığımızı gemişləndirməyə çalışırıq. Bu, istər tibbi-səhiyyə sahəsində, istər təlim-təhsil sahəsində olsun, istərsə də mədəniyyət və başqa sahələrdə də öz qarşılıqlı fəaliyyətimizi genişləndirməyə çalışırıq".

Qeyd edək ki, Səudiyyə Ərəbistanı Krallığının hökuməti bu ölkənin Kral Salman Humanitar Yardım Mərkəzi vasitəsilə Azərbaycan Respublikasında həyata keçirilən humanitar minatəmizləmə fəaliyyətinə maliyyə dəstəyi göstərəcək. Bu məqsədlə Azərbaycan Respublikası Minatəmizləmə Agentliyinin İdarə Heyətinin sədri Vüqar Süleymanov və Kral Salman Humanitar Yardım Mərkəzinin Tibb və Ətraf Mühit Departamentinin direktor müavini Abdullah Məhəmməd Əlvadeyi arasında Maliyyə Yardımı Memorandumu imzalanıb. Tədbirdə Səudiyyə Ərəbistanı Krallığının Azərbaycan Respublikasındakı fövqəladə və səlahiyyətli səfiri Essam bin Saleh Algetal da iştirak edib.