BAKI, AzerVoice

İsrail ordusu tərəfindən Qəzzada yerləşən "Fəhmi əl-Cərdcavi" məktəbinə endirilən hava zərbəsi nəticəsində həlak olanların sayı 36-ya yüksəlib.

AzerVoice xəbər verir ki, bu barədə Livanın "Al Mayadeen" telekanalı məlumat yayıb.

Məlumatda deyilir ki, atəşə tutulan binada qaçqınlar və məcburi köçkünlər yerləşdirilmişdi.

Daha əvvəl hücum nəticəsində ölənlərin sayının 25 olduğu bildirilmişdi. Onların arasında bir neçə uşaq, bir jurnalist və azı iki humanitar təşkilatın əməkdaşı olduğu qeyd olunmuşdu.

Xatırladaq ki, 2023-cü il oktyabrın 7-də HƏMAS-ın üzvləri Qəzza zolağından İsrail ərazisinə daxil olaraq sərhəd bölgələrində yaşayan mülki şəxsləri qətlə yetirmiş və bir sıra insanları girov götürmüşdülər. Bu hücuma cavab olaraq, İsrail HƏMAS-ın hərbi və siyasi infrastrukturunu məhv etmək və bütün girovları azad etmək məqsədilə Qəzza zolağında hərbi əməliyyata başlamışdı.

Öyən il martın 18-də İsrail ordusu yanvarda elan olunmuş atəşkəsi pozaraq Qəzzaya qarşı yenidən genişmiqyaslı hərbi əməliyyatlara start verdi. İsrail Baş naziri Binyamin Netanyahunun ofisi, HƏMAS-ın vasitəçilər və ABŞ Prezidenti Donald tramp tərəfindən təyin olunmuş xüsusi nümayəndə Stiven Uitkoffun təkliflərini rədd etdiyini əsas gətirərək, bu hücumların məqsədinin girovların azad edilməsi olduğunu bildirdi. HƏMAS isə cavab olaraq, hərbi əməliyyatların yenidən başlamasına görə İsrail və ABŞ-ı ittiham etdi.