Bakı, AzerVoice
Əfqanıstanın Əxlaqın Təbliği, Pisliklərin qarşısının alınması və şikayətlərə baxılması Nazirliyi (MOPVPV) qadınlara qarşı bir çox zorakılıq hallarının qarşısını aldıqlarını açıqlayıb.
AzerVoice xəbər verir ki, Əfqanıstan İslam Əmirliyinin MOPVPV Nazirliyi təhlükəsizlik qüvvələrinin 280-dən çox əməkdaşını saqqal saxlamadıqlarına görə işdən çıxarıb və keçən il Əfqanıstanda “əxlaqsız hərəkətlər” etdiklərinə görə 13 mindən çox adamı həbs edib.
MOPVPV-nın hər il açıqladığı məlumatlara görə, saxlanılanların təxminən yarısı 24 saatdan sonra sərbəst buraxılıb.
Nazirliyin Planlaşdırma və Qanunvericilik şöbəsinin müdiri Muhibullah Muhlisin keçirdiyi mətbuat konfransında bildirilib ki, ötən il dövlət orqanları tərəfindən 21 min 328 musiqi aləti məhv edilib və müvafiq mağazalarda "cəmiyyətin mənəvi dəyərlərinə zidd” film və serialların satışının qarşısı alınıb.
Nazirlik 281 təhlükəsizlik qüvvəsinin saqqalsız olduğunu aşkarladığını və onlara müəyyən edilmiş qaydalar çərçivəsində əvvəlcə xəbərdarlıq edildiyini, daha sonra xəbərdarlıqlara məhəl qoymayan bu şəxslərin vəzifələrindən azad edildiyini bildirib.
Qeyd edək ki, MOPVPV Talibanın ölkədə hakimiyyəti ələ keçirməsindən qısa bir müddət sonra yaradılıb. Sözügedən nazirlik Birləşmiş Millətlər Təşkilatı və Qərb qurumlarının davamlı tənqid hədəfinə çevrilib.
MOPVPV nazirliyinə bağlı məsul şəxslər küçələrdə dolaşır və insanlara İslam dininin müəyyən etdiyi dəyərlərə görə yaşamaları üçün təlqin göstərirlər.
İslam Əmirliyi administrasiyası həm Birləşmiş Millətlər Təşkilatı, həm də Qərb dövlətləri tərəfindən onlara qarşı edilən tənqidləri “daxili işlərinə müdaxilə” kimi qiymətləndirərək nəzərə almadığını ifadə edib.
Digər tərəfdən, Muhlis pul qarşılığında fahişəliklə məşğul olduğu təsbit edilən 200 nəfərin tutulduğunu və 2600-dən çox qadına qarşı zorakılığın qarşısının alındığını bildirib.
