Bakı. AzerVoice:
Əfqanıstandakı İslam Əmirliyi administrasiyası vətəndaşların vergidən azad edilməsi ilə bağlı yeni fərman imzalayıb.
AzerVoice xəbər verir ki, İslam Əmirliyi administrasiyasının rəhbəri Şeyxül Hədis Hibetullah Axundzadənin verdiyi fərmanla vergilərdə müəyyən tənzimləmələr edilib.
Müvafiq olaraq, illik gəliri 2 milyon əfqanidən (27.890 dollar) aşağı olan vergi ödəyiciləri gəlir vergisindən azad ediləcəklər. Əgər kiminsə illik satışları dörd milyon olarsa, bunun iki milyonu vergidən azaddır, digər iki milyonu isə 0,3 faizlə vergiyə cəlb olunacaq”.
Əvvəlki tənzimləmədə illik gəliri 150 min əfqandan aşağı olan vergi ödəyiciləri vergidən azad edilir, bu məbləğdən yuxarı gəlir əldə edənlərdən isə 0,5 faiz vergi tutulurdu.
Sözügedən qərarın ölkədə sənaye və ticarətin inkişaf etdirilməsi məqsədi ilə qəbul edildiyi bildirilib.
Sənaye və Ticarət Naziri vəzifəsini icra edən Nuruddin Əzizi deyib: “Bizneslərdən, özəl sektordan və digər ticarət obyeklərindən yığılan vergilər, gəlirlər və xidmət haqları olmadan bir ölkədə hökuməti idarə etmək mümkün olmaz”.
İslam Əmirliyinin İnzibati İşlər üzrə Baş İdarəsinin rəisi Nur-Ul-Haq Ənvar deyib: “İnsanlar diqqət yetirsələr görərlər ki, İslam Əmirliyinin həyata keçirdiyi islahatlar nə şou, nə də özbaşınalıqdır, realdır və mövcud vəziyyətdə vətəndaşların ehtiyaclarına cavab verir."
Ali təhsil naziri vəzifəsini icra edən Neda Məhəmməd Nadim deyib: “Vergilərin gündəlik azaldılması bizim sistemin bir siyasətidir, bu isə dindarlıq və sistemin İslama uyğun olmasından irəli gəlir”.
Maliyyə Nazirliyinin məlumatına görə, ölkə üzrə 206 növ sahibkarlıq subyekti, o cümlədən dükan və ticarət obyekləri fəaliyyət göstərir. Nazirlik bütün sahibkarları vergilərini vaxtında ödəməyə və Maliyyə Nazirliyi ilə əməkdaşlığa çağırıb.
İqtisadiyyat naziri vəzifəsini icra edən Din Mohammad Hanif, "İslam Əmirliyinin heç bir xarici yardım almadığı bir vaxtda güzəştlər və ya asanlıqlar təmin edilir" deyib.
Qeyd edək ki daha öncə 2022-də Əfqanıstan İslam Əmirliyi vergi cəzalarından azad edilmə ilə bağlı da qərar çıxarmışdı.
