BAKI,VOA Orxan Qədirzadə
Hollandiyada qaçqınların yerləşdirildiyi mərkəzdə polis əməkdaşlarının hamilə fələstinli qadına qarşı davranışını əks etdirən görüntülər ölkədə və beynəlxalq ictimaiyyətdə geniş müzakirələrə səbəb olub.
Paytaxt Amsterdam yaxınlığındakı Zeyft qəsəbəsinin Kampvex ərazisində yerləşən sığınacaq mərkəzində baş vermiş hadisə zamanı polis əməkdaşlarının hamilə qadını yerə yıxması əks olunan video sosial şəbəkələrdə milyonlarla baxış toplayıb.
Yayılan görüntülərə görə, insident polis əməkdaşlarının sığınacaq mərkəzində yaşayan fələstinli şəxsi saxlaması zamanı baş verib. Həmin şəxsin həyat yoldaşı olan hamilə qadın ərinin vəziyyətini öyrənmək və onun yanında qalmaq istəyəndə vəziyyət gərginləşib.
Kadrlarda polis əməkdaşlarından birinin qadını itələyərək yerə yıxdığı görünür. Bundan sonra qadının həyat yoldaşı müdaxilə etməyə çalışıb və hadisə yerində əlavə təhlükəsizlik qüvvələri cəlb olunub.
Fələstinli qaçqın, 30 yaşlı Vissam Miqdad bildirib ki, hadisə onun ailəsinin Qəzza zolağında yaşadığı vəziyyətlə bağlı keçirdiyi psixoloji gərginlik fonunda baş verib.
Onun sözlərinə görə, sığınacaq mərkəzində yaranmış mübahisədən sonra polis tərəfindən saxlanılıb. Miqdad iddia edib ki, saxlanılarkən polis əməkdaşlarına həyat yoldaşının hamilə olduğunu bildirsə də, buna baxmayaraq qadına qarşı kobud rəftar göstərilib.
Miqdad qeyd edib ki, hadisədən sonra dörd gün nəzarətdə saxlanılıb və daha sonra sərbəst buraxılıb. O, həmçinin həyat yoldaşının hadisədən bir neçə gün sonra səhhətində problemlər yarandığını bildirib.
Hadisənin görüntülərinin təsadüfən ərazidə olan bir uşaq tərəfindən çəkildiyi və sosial şəbəkələrdə yayılmasından sonra geniş rezonans doğurduğu qeyd olunur.
Hollandiya polisi isə hadisə ilə bağlı araşdırmaya başladığını açıqlayıb. Hüquq-mühafizə orqanları yayılan videoların hadisənin yalnız bir hissəsini əks etdirdiyini bildirərək bütün şəraitin ətraflı şəkildə araşdırıldığını bəyan edib.
Polisin məlumatına görə, əməliyyat mayın 19-da axşam saatlarında sığınacaq mərkəzində baş vermiş dava barədə daxil olan məlumat əsasında həyata keçirilib. Hüquq-mühafizə orqanları əməkdaşlarının ərazidə olan insanların təhlükəsizliyini təmin etmək məqsədilə müdaxilə etdiyini vurğulayıb.
Hadisə insan hüquqları müdafiəçiləri və ictimai fəallar tərəfindən də sərt tənqid olunub.
BMT-nin işğal altındakı Fələstin ərazilərində insan hüquqları üzrə xüsusi məruzəçisi Françeska Albaneze sosial şəbəkədə paylaşdığı açıqlamada hadisəyə etirazını ifadə edib.
Hollandiyalı fəallar və hüquq müdafiəçiləri də hamilə qadına qarşı güc tətbiqinin yolverilməz olduğunu bildirərək şəffaf və müstəqil araşdırma aparılmasını tələb ediblər.
Müşahidəçilərin fikrincə, hadisə Avropada qaçqınlarla davranış, polis səlahiyyətlərinin tətbiqi və həssas qrupların müdafiəsi məsələlərini yenidən gündəmə gətirib.
Bir sıra hüquq müdafiə təşkilatları araşdırmanın nəticələrinin ictimaiyyətə açıqlanmasının vacibliyini vurğulayaraq, qanun pozuntusu müəyyən ediləcəyi təqdirdə məsul şəxslərin cavabdehlik daşımalı olduğunu bildiriblər.