BAKI,VOA, Orxan Qədirzadə
İranla davam edən müharibə fonunda kəskin enerji böhranı ilə üzləşən Pakistan hökuməti paytaxt İslamabadda ictimai nəqliyyatın tamamilə ödənişsiz olacağını elan edib.
VOA xəbər verir ki, bu barədə ölkənin daxili işlər naziri Mohsin Naqvi rəsmi məlumat yayıb.
Nazirin sözlərinə görə, yeni qayda şənbə günündən etibarən qüvvəyə minəcək. Əhaliyə sosial dəstək məqsədilə atılan bu addım paytaxt sakinlərinin enerji şoku və artan yanacaq xərcləri qarşısında yükünü yüngülləşdirmək məqsədi daşıyır. Mohsin Naqvi qeyd edib ki, bu təşəbbüsün maliyyələşdirilməsi üçün Daxili İşlər Nazirliyi tərəfindən 350 milyon rupi məbləğində vəsait ayrılıb.
Xatırladaq ki, regionda genişlənən hərbi münaqişə Pakistan iqtisadiyyatına, xüsusilə enerji sektoruna ciddi mənfi təsir göstərib. Hökumətin bu qərarı ictimaiyyət tərəfindən böhran dövründə mühüm humanitar addım kimi qiymətləndirilir.