BAKI,VOA, Fərid Mikayılov

Taylandda keçirilən erkən parlament seçkilərindən sonra Anutin Çarnvirakun yenidən hökumət başçısı vəzifəsinə gətirilib.

VOA xəbər verir ki, Tayland Nümayəndələr Palatasında yeni baş nazirin seçilməsi üçün səsvermə keçirilib.

Açıq səsvermənin nəticələrinə görə, Bhumcaytay Partiyasının lideri Anutin Çarnvirakun 293 səs toplayaraq rəqibi – Xalq Partiyasının lideri Natthaphonq Ruenqpanyavutun 119 səsini üstələyib.

499 üzvdən ibarət parlamentdə mütləq çoxluğu əldə edən Anutin Çarnvirakun bununla da yenidən Taylandın baş naziri seçilib.

Parlamentin sədri Sofon Zaram səsvermənin nəticələrini təsdiq üçün Tayland kralı Maha Vaciralonqkorna təqdim edəcək. Krallıq təsdiqindən sonra yeni hökumətin formalaşdırılması prosesinə başlanacaq.

Qeyd edək ki, Anutin Çarnvirakun 2026-cı ilin əvvəlində erkən seçkilərin keçirilməsi məqsədilə 12 dekabr 2025-ci ildə parlamenti buraxmışdı. Bu qərar Kamboca ilə yenidən başlayan silahlı qarşıdurmaların beşinci gününə təsadüf etmişdi.

8 fevral tarixində keçirilən erkən seçkilərdə Bhumcaytay Partiyası parlamentdə ən çox mandat qazanaraq qalib olub.

Məlumata görə, Taylandda son 87 ildə parlament 16 dəfə buraxılıb. İlk belə qərar 1938-ci ildə qəbul edilib və sonrakı illərdə bir neçə dəfə təkrarlanıb.