BAKI, Azervoice, Nərmin Ağayeva
İspaniyada ifrat sağçı partiyanın təşəbbüsü ilə müsəlmanların dini bayramlarının ictimai yerlərdə qeydinə qadağa qoyulub.
Azervoice xəbər verir ki, İspaniyanın cənubundakı Mursiya əyalətinin Cumilla bələdiyyəsində sağçı Vox partiyasının təzyiqi ilə müsəlmanların dini bayramlarının ictimai yerlərdə qeyd edilməsi 2026-cı ildən etibarən qadağan olunub. Bu qərar Vox-un dəstəklədiyi Xalq Partiyası (PP) ilə koalisiya çərçivəsində qəbul edilib.
Qərar solçu müxalifət partiyaları tərəfindən İspaniya Konstitusiyasına və dini azadlıqları təmin edən 1992-ci il əməkdaşlıq müqaviləsinə zidd olaraq tənqid edilir. Podemos-Birləşmiş Sol ittifaqı qərarı islamafobik və irqçi kimi qiymətləndirərək, onu ləğv etmək üçün Konstitusiya Məhkəməsinə müraciət edəcəyini açıqlayıb.
Qeyd edək ki, Cumillada təxminən 1,500 müsəlman yaşayır və ölkə üzrə isə rəsmi məlumatlara görə 2,5 milyon, qeyri-rəsmi rəqəmlərə görə isə 3 milyon müsəlman mövcuddur.