BAKI, AzerVoice

Almaniya, düşmənin dərin arxa mövqelərindəki hədəfləri məhv etmək üçün nəzərdə tutulmuş uzaqmənzilli zərbə tipli pilotsuz uçuş aparatlarının (PUA) hazırlanması üzrə layihəyə start verir. AzerVoice xəbər verir ki,bu barədə Almaniyanın nüfuzlu "Handelsblatt" nəşri məlumat yayıb.

Nəşrin yazdığına görə, layihə çərçivəsində üç fərqli konsorsium Almaniya Hərbi-Hava Qüvvələrinin aparıcı müdafiə şirkətləri və texnologiya startaplarına göndərdiyi sorğudan sonra müvafiq konsepsiyalar üzərində işləyir.

Layihədə Airbus Defence şirkəti ABŞ mənşəli Kratos startapı ilə birgə, Rheinmetall isə Anduril adlı dron istehsalçısı ilə əməkdaşlıq edir. Həmçinin Münhendə yerləşən Helsing startapı da layihəyə cəlb olunub.

“Bu dronlar minlərlə kilometr məsafəni qət edə bilməli, hədəfə müstəqil şəkildə çata bilməli və mümkün qədər radarlara görünməz olmalıdır. Bundesver 2029-cu ilə qədər bu tip ilk dronları arsenalına daxil etməyi planlaşdırır,” – deyə nəşrdə vurğulanır.

Qeyd olunur ki, yeni nəsil PUA-ların uçuş məsafəsi min kilometrdən artıq, sürəti isə səs sürətinə yaxın olmalıdır. Bundan əlavə, qurğuların tamamilə avtonom şəkildə fəaliyyət göstərməsi və süni intellekt sistemlərinə əsaslanması nəzərdə tutulur.

Almaniya Müdafiə Nazirliyi artıq ilkin danışıqların aparıldığını təsdiqləsə də, rəsmən tenderin hələ elan olunmadığını bildirib.