BAKI, AzerVoice

ABŞ Prezidenti Donald Tramp, əgər ticarət danışıqlarında nəzərəçarpacaq irəliləyiş əldə olunmasa, avqustun 1-dən etibarən 2 aprel tarixində elan edilmiş gömrük rüsumlarını bərpa edəcək.

AzerVoice xəbər verir ki, bu barədə ABŞ maliyyə naziri Skott Bessent CNN kanalına müsahibəsində bildirib.

“Prezident Tramp bəzi ticarət tərəfdaşlarımıza məktub göndərmək niyyətindədir. Bu məktublarda deyiləcək ki, əgər bu məsələni irəlilətməsəniz, avqustun 1-dən etibarən 2 aprel tarixində elan edilmiş rüsumlar qüvvəyə minəcək” - deyə, o qeyd edib.

Bessent əlavə edib ki, bu cür məktublar təxminən 100 ölkənin rəhbərliyinə göndəriləcək. Bu ölkələrlə ABŞ-ın genişmiqyaslı ticarət əlaqələri yoxdur.

Nazir həmçinin bildirib ki, yaxın günlərdə ABŞ ilə ticarət sazişlərinin bağlanmasına dair “bir neçə böyük elan” da verilə bilər.

Xatırladaq ki, 2 aprel tarixində Tramp 185 ölkə və əraziyə aid məhsullara gömrük rüsumları tətbiq edəcəyini açıqlamışdı. Ümumi tariflər 10 faiz səviyyəsində təyin olunaraq aprelin 5-də, fərdi tariflər isə aprelin 9-da qüvvəyə minib. Elə həmin gün Tramp bəyan etmişdi ki, bəzi cavab rüsumlarının tətbiqi 90 gün müddətinə dayandırılır. Ağ Ev bu qərarın ticarət danışıqları aparıldığı üçün verildiyini izah etmişdi.

Bu müddət ərzində vahid tarif olaraq 10 faizlik rüsum tətbiq olunur. 27 iyun tarixində Tramp qeyd etmişdi ki, ABŞ təxminən 1,5 həftə ərzində bir sıra ölkələri ayrı-ayrı sazişlər imzalanmayacağı təqdirdə iki tərəfli ticarətə dair yeni şərtlərlə, o cümlədən ABŞ bazarına gətirilən məhsullara tətbiq ediləcək tariflərlə bağlı məlumatlandıracaq.