BAKI, AzerVoice

Somalinin paytaxtı Moqadişoda yerləşən beynəlxalq hava limanında döyüş sursatı daşıyan hərbi helikopter qəzaya uğrayıb.

AzerVoice xəbər verir ki, bu barədə helikopterin mənsub olduğu Uqanda ordusunun nümayəndəsi məlumat verib.

Məlumata əsasən, qəza nəticəsində beş nəfər həlak olub, altı nəfər xəsarət alıb.

Ordu nümayəndəsinin sözlərinə görə, yaralananlardan üçü helikopterin yaxınlığında olan şəxslərdir. Helikopterdə ümumilikdə səkkiz nəfər olub, onlardan altısı ekipaj üzvü idi. Pilot, ikinci pilot və bort mühəndisi qəza zamanı sağ qalıb və hazırda xəstəxanada müalicə olunurlar.

Qəzaya uğrayan Mi-24 tipli helikopter Somalinin Aşağı Şabel bölgəsində yerləşən Balidoqle Hərbi Hava Qüvvələri bazasından havaya qalxmış və Moqadişo beynəlxalq hava limanı ərazisinə düşmüşdü. Uqanda ordusunun rəsmi nümayəndəsi Feliks Kulayigi bildirib ki, helikopterdə döyüş sursatları olub. O, helikopterin yerdən atəşə tutulması ehtimalını istisna edib, lakin qəzanın səbəblərini araşdırmaq üçün Moqadişoya mütəxəssislərdən ibarət qrup göndəriləcəyini açıqlayıb.

Somali mediasının verdiyi məlumata görə, qəza zamanı helikopterdə baş verən partlayış yanğına səbəb olub. Qəzaya uğrayan helikopter Afrika İttifaqının Somalidə yerləşdirilmiş sülhməramlı qüvvələrinin tərkibində xidmət edirdi.

Hazırda Moqadişo beynəlxalq hava limanı normal rejimdə fəaliyyətini davam etdirir.