Bakı. AzerVoice:
İranın nüvə doktrinasında heç bir dəyişiklik olmayıb.
AzerVoice xəbər verir ki, bu barədə İran Xarici İşlər Nazirliyinin sözçüsü Nasser Kenani son həftələrdə ölkədə nüvə silahının qadağan edilməsi ilə bağlı strategiyanın dəyişdirilə biləcəyi ilə bağlı artan iddialara açıqlama verib.
"İranın nüvə doktrinasında heç bir dəyişiklik olmayıb. İran fitvaya uyğun olaraq nüvə silahının istehsalını və istifadəsini qadağan edib" – deyə o qeyd edib.
Kenani bəyan edib ki, onlar kütləvi qırğın silahlarının beynəlxalq təhlükəsizliklə yanaşı, bəşəriyyətə də təhlükə yaratdığına inanırlar.
Xatırladaq ki, aprelin 1-də İsrailin İranın Dəməşqdəki konsulluğuna hücumundan sonra ölkədəki bəzi siyasətçilər Xamneyinin fitvasının dəyişə biləcəyini və İranın da nüvə silahı istehsal edə biləcəyini iddia ediblər.
Cavad Kərimi Kuddusi, Xamneyinin fitvasının dəyişdiriləcəyi təqdirdə bir həftə ərzində ilk nüvə sınağının həyata keçiriləcəyini iddia edib. İranlı deputatın bu paylaşımı ölkə daxilində də reaksiyalara səbəb olub.
İbrahim Rəisi aprelin 27-də etdiyi çıxışda Xamneyinin fitvasına uyğun olaraq ölkəsinin nüvə və müdafiə doktrinasında nüvə silahının istehsalına yer olmadığını bildirib.
Hafiz Rufizoğlu