Bakı,AzerVoice

İtaliyanın Siciliya adasındakı aktiv vulkan olan Etna dağından külün atılmasının hava nəqliyyatında axsamalara səbəb olduğu bildirilir.

AzerVoice xəbər verir ki, Etnada davam edən püskürmə fəaliyyəti və eyni vaxtda atmosferə vulkanik kül emissiyası səbəbiylə vulkanın cənub-qərbindəki hava məkanının müəyyən bir vaxta qədər uçuşlara bağlandığı bildirilib.

Açıqlamada qeyd olunub ki, hazırda Kataniya Hava Limanından uçan reyslər üçün heç bir məhdudiyyət yoxdur, lakin sərnişinlərdən uçuşların vəziyyətini yoxlamadan hava limanına gəlməmələri xahiş olunur.

Son 24 saatda Kataniya Hava Limanından 32 uçuşun başqa hava limanlarına yönləndirildiyi, Lufthansa və Easyjet kimi hava yollarının da Kataniyaya uçuşlarının bir qismini ləğv etdiyi bildirilib.

Bu arada Etnanın püskürdüyü sıx kül səbəbindən vulkanın ətrafındakı yaşayış məntəqələrində vulkanik kül yağışlarının yaşandığı qeyd edilib.

Son səkkiz gün ərzində Etna vulkanının müxtəlif nöqtələrində lava axını, "Yeni Ağız" və "Cənub-Şərq" kraterlərində kül və lava atılması kimi müxtəlif vulkanik fəaliyyətlər müşahidə olunub.

Qeyd edək ki, şiddətli kül və lava püskürmələri kimi vulkanik fəaliyyət sonuncu dəfə 2024-cü ilin yayında Avropa qitəsinin ən yüksək aktiv vulkanı olan Siciliya adasındakı Etna dağında müşahidə edilib.