BAKI,VOA,Yusif Şərifzadə

Britaniyanın dəniz təhlükəsizliyi və fövqəladə hallara müdaxilə sahəsində fəaliyyət göstərən “Ambrey” şirkəti Oman sahillərində saya oturmuş “Caroline Bezengi” neftdaşıyan gəmisinin xilas edilməsi və ətraf mühitə yayılan neftin qarşısının alınması əməliyyatına başlayıb. Gəmidən sızan neftin artıq Oman sahillərinə çatdığı və dəniz canlıları üçün ciddi təhlükə yaratdığı bildirilir.

VOA xəbər verir ki, “Ambrey” əməkdaşları Oman Hərbi Hava Qüvvələrinin köməyi ilə gəmiyə qalxaraq onun texniki vəziyyətini qiymətləndiriblər. Bundan sonra gəminin sabitləşdirilməsi və daha böyük həcmdə neft sızmasının qarşısının alınması istiqamətində işlərə başlanılıb.

Şirkətin qlobal fövqəladə hallara müdaxilə üzrə rəhbəri Ed Vollaston bildirib ki, bölgədə hökm sürən əlverişsiz hava şəraiti xilasetmə işlərini xeyli çətinləşdirir. Xüsusilə Oman və ətraf ərazilərə təsir göstərən Xərif mövsümünün güclü küləkləri və dalğaları əməliyyat üçün əlavə çətinlik yaradır.

“Ambrey” əməliyyatın nə qədər davam edəcəyi və ümumi xərcinin nə qədər olacağı barədə hələlik açıqlama verməyib. Əraziyə neft sızmalarına qarşı mübarizə üzrə beynəlxalq mütəxəssislər, gəmilər, hava vasitələri və təxminən 100 ton xüsusi avadanlıq cəlb olunub.

Peyk görüntüləri “Caroline Bezengi”dən sızan neftin əlverişsiz hava şəraitinin təsiri ilə geniş əraziyə yayıldığını göstərir. Sızmanın qorunan dəniz ərazisini, eləcə də Ərəbistan dənizində yaşayan donqar balinaları və Sokotra qarabatdaqları kimi canlıları təhlükə altına aldığı bildirilir.

“Caroline Bezengi” iyunun əvvəlində baş verdiyi bildirilən və səbəbi hələ dəqiq müəyyənləşdirilməyən partlayışdan sonra zədələnib. Gəmi iyunun 30-da Omanın cənub-qərbindəki Əl-Qibliyyə adası yaxınlığında saya oturub. Gəmidə təxminən 800 min barel Rusiya neftinin olduğu bildirilir.

Mütəxəssislər gəminin batacağı və ya gövdəsinin parçalanacağı halda yükün böyük hissəsinin dənizə axa biləcəyi barədə xəbərdarlıq edirlər. Belə bir vəziyyət Oman sahillərində uzunmüddətli və ağır ekoloji fəsadlara səbəb ola bilər.