BAKI,VOA,Yusif Şərifzadə
Livan Səhiyyə Nazirliyi İsrailin hücumları nəticəsində ölkədə həyatını itirənlərin və yaralananların sayı ilə bağlı yeni məlumat yayıb.
VOA xəbər verir ki, nazirliyin açıqlamasına görə, martın 2-dən etibarən davam edən hücumlar nəticəsində 3 min 798 nəfər həyatını itirib.
Məlumatda bildirilir ki, eyni dövrdə 11 min 781 nəfər müxtəlif dərəcəli bədən xəsarətləri alıb.
Nazirlik son 24 saat ərzində də itkilərin qeydə alındığını vurğulayıb.
Açıqlamaya əsasən, ötən sutka ərzində həyata keçirilən hücumlar nəticəsində 15 nəfər həlak olub.
Daha 82 nəfərin yaralandığı bildirilib.
Rəsmi qurum humanitar vəziyyətin ağır olaraq qaldığını və səhiyyə müəssisələrinin ciddi yük altında fəaliyyət göstərdiyini qeyd edib.
İtkilərin sayının artması bölgədəki gərginliyin davam etdiyini göstərir.