BAKI,VOA Nailə Babazadə

İsrail ordusunun 17 apreldə qüvvəyə minən və ABŞ Prezidenti Donald Trampın vasitəçiliyi ilə müddəti uzadılan atəşkəs razılaşmasına baxmayaraq, Livanın cənubuna təşkil etdiyi hava hücumları nəticəsində mülki itkilər qeydə alınıb.

VOA xəbər verir ki, Livanın rəsmi xəbər agentliyi NNA-nın məlumatına görə, İsrail hərbi aviasiyası ölkənin cənubunda yerləşən Sur şəhərinin Hinniyə qəsəbəsini hədəf alıb. Bu hücum zamanı Şövqi Diyab ailəsinin yaşadığı ev vurulub və nəticədə ailənin üç üzvü — ata, ana və bir uşaq həyatını itirib. Eyni zamanda, Livan Səhiyyə Nazirliyi Coya qəsəbəsinə edilən başqa bir hava zərbəsi nəticəsində 2 nəfərin öldüyünü, aralarında 5-i uşaq olmaqla 22 nəfərin yaralandığını açıqlayıb.

Bölgədəki gərginlik yalnız hava zərbələri ilə məhdudlaşmır. İsrail ordusu atəşkəs dövründə Livanın cənubundakı sərhəd kəndlərində evlərin dağıdılmasını və yaşayış məntəqələrinin işğalını davam etdirir. Buna cavab olaraq Hizbullah qüvvələri də atəşkəsin pozulduğu əsas gətirərək İsrail hərbi bölmələrinə qarşı əməliyyatlar həyata keçirir. 2 martda başlayan irimiqyaslı müharibə indiyədək Livanda 2 500-dən çox insanın ölümünə və 1 milyondan çox insanın didərgin düşməsinə səbəb olub. Mövcud atəşkəs razılaşmasının kövrəkliyi və davam edən qarşılıqlı zərbələr bölgədəki humanitar böhranın daha da dərinləşməsi ilə bağlı narahatlıqları artırır.