BAKI,VOA, Orxan Qədirzadə

Qəzza zolağında məcburi köçkünlər arasında sağlamlıq böhranı kəskinləşir və yoluxucu xəstəliklərin yayılması ciddi narahatlıq doğurur.

VOA xəbər verir ki, Dünya Səhiyyə Təşkilatı ilin əvvəlindən etibarən Qəzzada məcburi köçkünlər arasında gəmiricilər və parazitlərlə əlaqəli 17 mindən çox yoluxma halının qeydə alındığını açıqlayıb.

Təşkilatın məlumatına görə, bölgədə yaşayış şəraitinin ağırlaşması, sanitariya problemləri və tibbi resurs çatışmazlığı xəstəliklərin sürətlə yayılmasına səbəb olur. Xüsusilə dəri xəstəlikləri – qaşınma, bit və digər parazitlərlə bağlı hallar geniş yayılıb və məcburi köçkün düşərgələrinin 80 faizindən çoxunda qeydə alınıb.

Hesabatda qeyd olunur ki, Qəzzada səhiyyə infrastrukturu ciddi zərər görüb. Ümumilikdə 1800-dən çox tibb müəssisəsi qismən və ya tamamilə dağıdılıb, sektor üzrə zərərin həcmi isə təxminən 1,4 milyard dollar qiymətləndirilir.

Məlumata əsasən, 2025-ci ilin oktyabr ayında qüvvəyə minmiş atəşkəs razılaşmasına baxmayaraq, bölgədə 2,4 milyona yaxın insanın yaşayış şəraiti ağır olaraq qalır. Onların təxminən 1,4 milyonu məcburi köçkündür və humanitar yardımın çatdırılmasına qoyulan məhdudiyyətlər vəziyyəti daha da çətinləşdirir.

BMT strukturları həmçinin dağıntılar arasında qalan partlamamış sursatların təhlükəsi barədə xəbərdarlıq edib. Qeyd olunur ki, bu risklər həm əhalinin geri qayıdışını ləngidir, həm də bərpa işlərinə mane olur.

Beynəlxalq təşkilatlar bölgəyə dərman, tibbi avadanlıq və humanitar yardımın çatdırılmasının sürətləndirilməsinə çağırış edir.