BAKI,VOA, Fərid Mikayılov

Cornell University tədqiqatçılarının apardığı və JAMA Network Open jurnalında dərc olunan araşdırmaya əsasən, insanın özünü yalnız hiss etməsi, real sosial təcriddən daha ciddi sağlamlıq riskləri yaradır.

Araşdırmada qeyd olunur ki, insanların həyatında neçə nəfərin olması deyil, həmin münasibətlərin necə qəbul edildiyi əsas rol oynayır. Eyni sosial şəraitdə olan şəxslər yalnızlıq hissinə görə fərqli sağlamlıq nəticələri ilə üzləşə bilər.

Tədqiqat müəlliflərindən, psixologiya professoru Anthony Ong bildirib ki, yalnızlıqla bağlı ənənəvi yanaşmalar əsasən sosial əlaqələrin artırılmasına yönəlsə də, bu, problemin tam həlli deyil.

Araşdırma çərçivəsində 50 yaşdan yuxarı minlərlə insanın uzunmüddətli məlumatları təhlil edilib və “sosial asimetriya” adlandırılan fenomen müəyyən edilib. Bu anlayış sosial təcrid ilə subyektiv yalnızlıq hissi arasındakı uyğunsuzluğu ifadə edir.

Nəticələr göstərib ki, özünü daha yalnız hiss edən şəxslərdə ürək-damar xəstəlikləri, xroniki ağciyər xəstəlikləri və ümumi ölüm riski daha yüksəkdir. Əksinə, sosial olaraq təcrid olunmasına baxmayaraq özünü yalnız hiss etməyən şəxslərdə risklər daha aşağı səviyyədə qeydə alınıb.

Dünya Səhiyyə Təşkilatının məlumatına görə, dünya üzrə insanların təxminən 16 faizi yalnızlıq problemi ilə üzləşir və bu, qlobal ictimai sağlamlıq məsələsi kimi qiymətləndirilir.

Bundan əlavə, digər elmi tədqiqatlar göstərir ki, xroniki yalnızlıq hissi insanın sosial münasibətləri təhlükə kimi qəbul etməsinə və zamanla daha çox təcrid olunmasına səbəb olur.