BAKI,VOA, Nailə Babazadə

Fələstinlilərin yerli idarəetmə orqanlarını müəyyənləşdirmək üçün sabah sandıq başına gedəcəyi bildirilib.

VOA xəbər verir ki, Fələstin Mərkəzi Seçki Komissiyasından verilən yazılı açıqlamaya görə, 25 aprel tarixində Qəzza zolağındakı Deyr əl-Bəlah şəhəri və işğal altındakı İordan çayının qərb sahilində (Qərbi Şəria) keçiriləcək seçkilərdə bələdiyyə məclisləri üçün 321 siyahı üzrə 1200-ü qadın olmaqla, cəmi 3 773 namizəd, kənd məclisləri üçün isə 93 kənd şurasında 1 358 nəfər mübarizə aparacaq.

Yerli seçkilərdə 1 milyondan çox insanın iştirak edəcəyi, təxminən 70 min nəfərin isə səsini Qəzza zolağındakı Deyr əl-Bəlah şəhərində istifadə edəcəyi gözlənilir. Seçki komissiyası prosesin idarə olunması üçün genişmiqyaslı hazırlıqlar görüldüyünü, 12-si Deyr əl-Bəlahda olmaqla, ümumilikdə 491 mərkəzdə səsvermənin keçiriləcəyini bildirib.

Açıqlamada qeyd olunub ki, başlanğıcda seçkilərin bütün şəhərlərdə keçirilməsi planlaşdırılsa da, sonradan Qəzza zolağında Deyr əl-Bəlah istisna olmaqla, digər ərazilərdə seçkilərin təxirə salınmasına qərar verilib. Həmçinin İordan çayının qərb sahilindəki bir bölgədə də təxirəsalma baş verib. Yerli seçkilər kənd və qəsəbələr də daxil olmaqla, ümumilikdə 420 yaşayış məntəqəsini əhatə edəcək.

Həmas və Fəth hərəkatları arasında 2007-ci ildə yaranan ixtilafdan bəri ümumi seçkilərin keçirilə bilmədiyi Fələstin torpaqlarında, sonuncu yerli seçkilərin birinci mərhələsi 11 dekabr 2021-ci ildə, ikinci mərhələsi isə 26 mart 2022-ci ildə baş tutmuşdu.