BAKI,VOA

Regionda baş verən ABŞ-İsrail-İran münaqişəsi fonunda Bəhreyn Kralı Həməd bin İsa Al Xəlifə vətənin təhlükəsizliyinə xələl gətirənlərə qarşı dərhal sərt tədbirlərin görülməsi üçün vəliəhd, Baş nazir Salman bin Həməd Al Xəlifəyə rəsmi tapşırıq verib. VOA xəbər verir ki, bu tədbirlərə həmin şəxslərin Bəhreyn vətəndaşlığına layiq olub-olmadıqlarına yenidən baxılması da daxildir.

Kral Həməd bazar günü bir qrup yüksək rütbəli rəsmini qəbul edərək ölkənin daxili işləri ilə bağlı mühüm məsələləri müzakirə edib. Bəhreyn Xəbər Agentliyinin (BNA) məlumatına görə, Kral dövlətin müharibənin fəsadlarını aradan qaldırmaqda qətiyyətli olduğunu vurğulayıb.

Kral vəliəhdə aşağıdakı istiqamətlərdə genişmiqyaslı və həlledici addımlar atmağı tapşırıb:

Müdafiə və iqtisadiyyat: Müəyyən edilmiş çatışmazlıqların aradan qaldırılması üçün müvafiq proqramların hazırlanması.

Xəyanətlə mübarizə: Vətənə xəyanət edənlərə, ölkənin təhlükəsizliyini və sabitliyini pozmağa cəhd edənlərə qarşı dərhal zəruri prosedurların başladılması.

Vətəndaşlıq məsələsi: "Vəziyyətin hələ də həssas olduğunu" nəzərə alaraq, Bəhreyn vətəndaşlığına layiq olan və olmayan şəxslərin müəyyən edilməsi və onlara qarşı qanunvericiliyə uyğun tədbirlərin görülməsi.

Kral Həməd vurğulayıb ki, dövlətin təhlükəsizliyi hər şeydən üstündür və bu yolda heç bir güzəştə yol verilməyəcək.