BAKI,VOA, Nailə Babazadə

İraq Parlamenti aprelin 11-də yeni prezidenti seçmək üçün iclas keçiriləcəyini bildirdi.

VOA xəbər verir ki, parlamentdən edilən yazılı açıqlamaya görə, prezident seçkisi üçün aprelin 11-də yenidən iclas təşkil olunacaq.

İraqda 2003-cü ildən sonra qurulan siyasi tənliyə görə, prezident kürd partiyalarının namizədləri arasından seçilir.

Sözügedən vəzifə üçün Kürdüstan Demokrat Partiyası (KDP) hazırkı Xarici İşlər naziri Fuad Hüseyni namizəd göstərdiyi halda, Kürdüstan Yurtsevərlər Birliyi (KYB) isə köhnə İraq hökumətində Ekologiya naziri vəzifəsində çalışmış Nizar Amidini namizəd göstərdi.

Namizədlər millət vəkillərinin üçdə iki səs çoxluğunu almalıdır. Əgər birinci turda bu təmin olunmazsa, ən çox səs alan iki namizəd arasında ikinci tur seçimi keçiriləcək. İkinci turda sadə səs çoxluğunu (yarıdan bir səs çox) alan namizəd qalib gələcək.

İraq konstitusiyasına görə, prezidentin səlahiyyət müddəti 4 ildir və eyni şəxs yalnız bir dəfə yenidən prezident seçilə bilər.

Seçiləcək prezident parlamentdəki ən böyük qrupun baş nazir namizədinə hökuməti qurmaq vəzifəsini verəcək.

İraqda parlament seçkiləri 11 noyabr 2025-ci il tarixində keçirilmişdi. Ölkədə yaşanan siyasi fikir ayrılıqları səbəbindən yeni hökumət hələ qurula bilməyib. Mövcud hökumət isə "gündəlik işləri icra edən hökumət" kimi fəaliyyətini davam etdirir.