BAKI,VOA, Orxan Qədirzadə

İsrail ordusu Livanın paytaxtı Beyrut daxil olmaqla, ölkənin müxtəlif bölgələrinə intensiv və şiddətli hava zərbələri endirib.

VOA xəbər verir ki, İsrail hərbi hava qüvvələri paytaxt Beyrutun mərkəzi nöqtələrini və əhalinin sıx məskunlaşdığı Dahi xəbər bölgəsini hədəf alıb. Şəhərdə qısa müddət ərzində ard-arda 9 güclü partlayış səsi eşidilib və hədəf alınan ərazilərdən qatı tüstü dumanları yüksəlməyə başlayıb. Hücumdan əvvəl dinc sakinlərə heç bir xəbərdarlıq edilmədiyi bildirilir.

İsrail ordusunun rəsmi açıqlamasına görə, cəmi 10 dəqiqə ərzində ölkənin müxtəlif istiqamətlərində eyni vaxtda 100 hava zərbəsi endirilib. Əməliyyatın Beyrutla yanaşı, Livanın şərqindəki Bekaa vadisi və cənub bölgələrini əhatə edən "genişmiqyaslı hücum dalğası" olduğu qeyd edilib. İsrail tərəfi bu hücumların Hizbullahın komanda mərkəzlərini və hərbi infrastrukturunu sıradan çıxarmaq məqsədi daşıdığını iddia edir. Bu, hərbi əməliyyatların başladığı gündən bəri Livana qarşı həyata keçirilən ən böyük hücum dalğası kimi qiymətləndirilir.

Maraqlıdır ki, bu gərginlik ABŞ və İran arasında əldə olunmuş müvəqqəti atəşkəs fonunda baş verir. İsrail Baş naziri Benyamin Netanyahu sözügedən atəşkəsin Livan cəbhəsinə aid olmadığını müdafiə edərkən, vasitəçi tərəf olan Pakistan razılaşmanın Livanı da əhatə etdiyini bildirib. ABŞ tərəfi isə hələlik bu ziddiyyətli bəyanatlarla bağlı rəsmi mövqeyini açıqlamayıb.