BAKI,VOA, Nailə Babazadə

Səudiyyə Ərəbistanının vəliəhd şahzadəsi Məhəmməd bin Salman şənbə günü Ciddədə FİFA prezidenti Canni İnfantino ilə görüşüb.

VOA xəbər verir ki, Səudiyyə Rəsmi Agentliyinin (SPA) məlumatına görə, tərəflər futbolda əməkdaşlığın gücləndirilməsi və inkişaf imkanlarının genişləndirilməsi məsələlərinə fokuslanıblar.

Görüşdə Krallıq ilə FİFA arasındakı mövcud tərəfdaşlıq nəzərdən keçirilib, həm həvəskar, həm də peşəkar səviyyədə idmanın böyüməsi perspektivləri müzakirə olunub. Səudiyyə Ərəbistanı özünün "Vision 2030" islahat proqramı çərçivəsində infrastruktura, istedadların inkişafına və beynəlxalq tədbirlərə böyük sərmayələr qoyaraq özünü qlobal idman mərkəzi kimi mövqeləndirir.

Son illərdə bir sıra regional və beynəlxalq turnirlərə ev sahibliyi edən Krallıq Yaxın Şərqdə futbolun kommersiya artımını və kütləviliyini təmin etmək üçün FİFA ilə sıx işləyir. Riyadın qlobal futbolda rolunu daha da genişləndirmək, o cümlədən gələcək dünya çempionatlarına ev sahibliyi etmək niyyətində olduğu bildirilir.

Qeyd edək ki, görüşdə Səudiyyə Ərəbistanının idman naziri Əbdüləziz bin Türki əl-Feysəl və Futbol Federasiyasının prezidenti Yaser əl-Misehal da iştirak ediblər.