BAKI, VOA, Nailə Babazadə

Livan Səhiyyə Nazirliyi çərşənbə günü verdiyi bəyanatda İsrail ordusunun Beyrutun cənub məhəllələrinə və paytaxt yaxınlığındakı yaşayış məntəqələrinə endirdiyi zərbələr nəticəsində azı 7 nəfərin həyatını itirdiyini bildirib.

VOA xəbər verir ki, məlumata görə, Beyrutun Jnah bölgəsindəki avtomobilləri hədəf alan reyd zamanı 5 nəfər ölüb, 21 nəfər yaralanıb. Təhlükəsizlik mənbələri bu hücumun binaları deyil, konkret nəqliyyat vasitələrində olan şəxsləri hədəf alan sui-qəsd cəhdi olduğunu ehtimal edirlər. Bundan əlavə, çərşənbə axşamı gecə saatlarında paytaxtın cənubundakı Xalde bölgəsinə endirilən zərbə daha 2 nəfərin ölümünə səbəb olub.

İsrail hərbçiləri hücumun "Hizbullah"ın yüksək rütbəli komandirlərindən birini məhv etmək məqsədi daşıdığını iddia etsələr də, qruplaşma bu barədə hələlik heç bir rəsmi məlumat yaymayıb. Digər tərəfdən, cənub cəbhəsində "Hizbullah" döyüşçüləri ilə İsrail quru qoşunları arasında Şamaa qəsəbəsi yaxınlığında şiddətli toqquşmaların davam etdiyi bildirilir. "Hizbullah" sərhədi keçərək İsrail hərbçilərinə raket zərbələri endirdiyini, İsrail mediası isə şimal bölgələrinə 40-dan çox raket atıldığını təsdiqləyib. Son günlərdə davam edən bu qarşıdurmalarda ən azı 10 İsrail əsgərinin həlak olduğu bildirilir.

Livanın baş naziri Nəvaf Salam keçən ay "Hizbullah"ın hərbi fəaliyyətini rəsmən qadağan etsə də, qruplaşma tərksilah olunmaqdan imtina edərək müqaviməti davam etdirir. Hazırda Livanda ölənlərin sayı 1200 nəfəri keçib, bir milyondan çox insan isə didərgin düşüb. İsrailin müdafiə naziri İsrail Katzın sərhədyanı kəndlərdəki evlərin söküləcəyi və 600 min qaçqının geri qayıtmasına icazə verilməyəcəyi barədə bəyanatı ölkədə ciddi narahatlıq doğurub. Beynəlxalq müşahidəçilər İsrailin bu addımları ilə Cənubi Livanda qalıcı işğal zonası yaratmağa çalışdığını ehtimal edirlər.