BAKI, VOA, Orxan Qədirzadə
İsrail ordusunun şənbə günü səhər saatlarında Qəzza şəhərinin şərqindəki Şücayə məhəlləsinə pilotsuz uçuş aparatı (PUA) ilə təşkil etdiyi hücum nəticəsində bir fələstinli həyatını itirib, digəri isə ağır yaralanıb.
VOA KİV-ə istinadən xəbər verir ki, şahidlərin bildirdiyinə görə, zərbə məhəllənin Şəmə bölgəsinə endirilib. Tibbi mənbələr həlak olan şəxsin Fəhmi Qəddum olduğunu, yaralının vəziyyətinin isə kritik qiymətləndirildiyini təsdiqləyib. Eyni zamanda, şənbə günü sübh saatlarında İsrail ordusu Qəzza zolağının müxtəlif nahiyələrinə hava və artilleriya zərbələri endirib.
Qeyd edək ki, bu hücumlar 10 oktyabr 2025-ci il tarixindən qüvvədə olan atəşkəs razılaşmasının növbəti pozuntusu kimi qiymətləndirilir. Rəsmi məlumatlara görə, atəşkəs elan olunduğu gündən bəri baş verən insidentlər nəticəsində 691 fələstinli həlak olub, 1876 nəfər isə müxtəlif dərəcəli bədən xəsarətləri alıb.