BAKI, VOA, Orxan Qədirzadə

Fələstin Futbol Assosiasiyası (PFA) FİFA-nın son hesabatında İsrail Futbol Assosiasiyasının (IFA) anti-ayrı-seçkilik öhdəliklərini "çoxsaylı şəkildə pozduğunu" müəyyən etməsindən sonra İsrailin beynəlxalq futboldan kənarlaşdırılması üçün çağırış edib.

VOA xəbər verir ki, PFA rəhbəri Cibril Racub İordan çayının qərb sahilində yerləşən Əl-Birə şəhərində keçirdiyi mətbuat konfransında İsrailin bütün beynəlxalq idman institutlarından qovulması üçün səyləri davam etdirəcəklərini bildirib.

FİFA ötən həftə qayda pozuntularına görə IFA-nı 150 000 İsveçrə frankı (təxminən 190 700 dollar) məbləğində cərimələyib. Cibril Racub bu qərarı "əhəmiyyətli addım" adlandırsa da, cərimənin tələb olunan minimum səviyyədən aşağı olduğunu və İsrailin tamamilə kənarlaşdırılmalı olduğunu vurğulayıb. O, "Beytar Yerusəlim" klubunun azarkeşləri tərəfindən nümayiş etdirilən irqçi davranışlara qarşı IFA-nın lazımi tədbirlər görmədiyini xatırladıb.

Racub çıxışında 2023-cü ilin oktyabrından bəri davam edən hərbi əməliyyatlar nəticəsində Fələstin idmanına dəyən zərərin statistik göstəricilərini açıqlayıb:

Həlak olan idmançı və məşqçilərin sayı 1 007 nəfər, dağıdılmış idman obyektlərinin sayı 265 olaraq müəyyən edilib.

PFA rəhbəri, həmçinin İsrailin bəzi idman rəsmilərinin hərbi əməliyyatları açıq şəkildə dəstəklədiyini və beynəlxalq hüquqa görə qeyri-qanuni hesab edilən məskunlaşma yerlərində fəaliyyət göstərən futbol klublarının İsrail liqalarında iştirakının yolverilməz olduğunu bildirib.

Qeyd edək ki, FİFA məskunlaşma yerlərindəki klublarla bağlı hələlik hər hansı sanksiya tətbiq etməyib. İsrail hazırda Avropa Futbol Assosiasiyaları İttifaqının (UEFA) üzvü kimi fəaliyyətini davam etdirir.