BAKI, VOA, Nailə Babazadə

İraqın ərazi sularında iki neft tankerinə endirilən zərbələr nəticəsində ən azı bir heyət üzvü həyatını itirib. İraqın Limanlar üzrə Baş Şirkətinin rəsmisi Fərxan əl-Fartusi bildirib ki, hücumdan sonra aparılan genişmiqyaslı xilasetmə əməliyyatları nəticəsində tankerlərdəki 51 işçi sağ-salamat təxliyə edilib və onların vəziyyəti hazırda qənaətbəxşdir.

VOA xəbər verir ki, Hindistanın Bağdaddakı səfirliyi isə həlak olan şəxsin Hindistan vətəndaşı olduğunu təsdiqləyib. Məlumata görə, hücuma məruz qalan gəmilərdən biri ABŞ-a məxsus olan və Marşall adalarının bayrağı altında üzən "Safesea Vishnu" neft tankeridir.

İranın İslam İnqilabı Keşikçiləri Korpusu (SEPAH) cümə axşamı verdiyi rəsmi bəyanatda Körfəzin şimal hissəsində Marşall adaları bayrağı altında üzən və ABŞ-a məxsus olduğu iddia edilən bir gəmini vurduqlarını təsdiqləyib. Hindistan səfirliyi qeyd edib ki, "Safesea Vishnu" gəmisi martın 11-də Bəsrə yaxınlığında fəaliyyət göstərərkən hədəf alınıb. Hücum zamanı həyatını itirən Hindistan vətəndaşından başqa, heyətin digər 15 Hindistanlı üzvü uğurla təxliyə edilib və hazırda təhlükəsiz yerdədir. Hindistan tərəfi hadisə ilə bağlı dərin narahatlığını bildirərək, dəniz nəqliyyatının hədəf alınmasını kəskin pisləyib.

Bu hadisə Yaxın Şərqdə davam edən genişmiqyaslı müharibənin dəniz ticarəti və enerji təhlükəsizliyi üçün yaratdığı riskləri bir daha gündəmə gətirib. Tehran rəhbərliyi ABŞ və İsrailin İrana qarşı zərbələrinə cavab olaraq Körfəzdəki gəmiçilik hərəkətlərinə və enerji infrastrukturuna qarşı hücumlarını intensivləşdirib. İraqın neft ixracatı üçün həyati əhəmiyyət kəsb edən Bəsrə limanı yaxınlığında baş verən bu son hücum qlobal neft bazarlarında qeyri-sabitliyi daha da artırıb. Beynəlxalq gəmiçilik şirkətləri bölgədəki təhlükəsizlik vəziyyətini yenidən qiymətləndirərək marşrutlarını dəyişməyə başlayıblar.