BAKI, VOA, Nailə Babazadə

Səudiyyə Ərəbistanının Kralı Salman bin Əbdüləziz Al Səud ölkənin "Təsis Günü" münasibətilə rəsmi "X" platformasında paylaşım edərək, krallığın tarixi köklərinə və dövlətçilik fəlsəfəsinə diqqət çəkib.

VOA xəbər verir ki, Kral Salman bildirib ki, mübarək Səudiyyə dövləti ulu babaları tərəfindən tövhid kəlməsi, ədalət prinsipi və xalqın vahid bayraq altında birləşdirilməsi üzərində inşa edilib. O qeyd edib ki, Allahın lütfü ilə əldə olunan bu tarixi birlik ölkəyə həm daxili təhlükəsizlik, həm də iqtisadi rifah qazandırıb.

Bayram münasibətilə Kral Salman və Vəliəhd şahzadə, Baş nazir Məhəmməd bin Salman Körfəz, ərəb və müsəlman ölkələrinin liderlərindən çoxsaylı təbrik məktubları alıblar. Beynəlxalq liderlər öz müraciətlərində Səudiyyə Ərəbistanının müasir dünyadakı rolunu yüksək qiymətləndiriblər. Xüsusilə krallığın regional sabitliyin təminatçısı kimi çıxış etməsi və müxtəlif sahələrdə qazandığı davamlı uğurlar dünya birliyinin diqqət mərkəzindədir. Bir çox ölkə rəhbərləri Səudiyyə Ərəbistanı ilə ikitərəfli əlaqələri bütün səviyyələrdə, xüsusilə iqtisadi və siyasi platformalarda inkişaf etdirmək əzmində olduqlarını vurğulayıblar.

"Təsis Günü" münasibətilə Səudiyyə Ərəbistanının bütün şəhərlərində genişmiqyaslı mədəni, milli və əyləncəli tədbirlər keçirilib. Bu fəaliyyətlər həm yerli əhali, həm ölkədə yaşayan əcnəbilər, həm də xarici turistlər tərəfindən böyük coşğu ilə qarşılanıb. Bayram proqramları çərçivəsində ölkənin üç əsrlik tarixi irsini əks etdirən sərgilər, milli geyim festivalları və ənənəvi rəqs nümayişləri təşkil olunub. Bu tədbirlər Krallığın "Vizyon 2030" hədəfləri çərçivəsində öz mədəni kimliyini dünyaya tanıtmaq strategiyasının mühüm tərkib hissəsi kimi qiymətləndirilir.