BAKI, AzerVocie
HƏMAS hərəkatının rəhbərliyinə yaxın mənbələr İsrailin Qəzza zolağında hərəkatın silahlanması ilə bağlı iddialarını “qorxu yaratmaq məqsədli şişirtmə” kimi qiymətləndirib.
Trend-in Asharq Al-Awsat qəzetinə istinadən verdiyi məlumata görə, mənbələr HƏMAS-ın Qəzzada malik olduğu silahların əsasən yüngül atıcı silahlardan ibarət olduğunu və İsrail üçün real hərbi təhlükə yaratmadığını bildirib. Qeyd olunub ki, bu silahlar yalnız müdafiə məqsədi daşıyır və 2023-cü il 7 oktyabr hadisələri kimi genişmiqyaslı əməliyyatlar üçün yararlı deyil.
Məlumata əsasən, silahlı qrupların ixtiyarında əsasən Kalaşnikov və M-16 tipli avtomatlar, məhdud sayda tank əleyhinə qumbara və fərdi ölçülü partlayıcı qurğular mövcuddur. Mənbələr bildiriblər ki, iki il davam edən müharibə zamanı HƏMAS raket, minaatan mərmiləri və ağır silah ehtiyatlarının böyük hissəsini istifadə edib və ya bu arsenal İsrail tərəfindən məhv edilib.
HƏMAS-a yaxın dairələr İsrailin silah məsələsini atəşkəs razılaşmasının ikinci mərhələsinə keçidi əngəlləmək üçün bəhanə kimi istifadə etdiyini vurğulayıb. Bildirilib ki, məqsəd Qəzza zolağında, xüsusilə də birinci mərhələdə çıxarılması nəzərdə tutulan “sarı xətt”in şərqində İsrail hərbi mövcudluğunu qorumaqdır.
Bu arada İsrailin baş naziri Beniyamin Netanyahu Fox News kanalına müsahibəsində Qəzzada hazırda 20 min HƏMAS üzvünün olduğunu və onların təxminən 60 min ədəd silaha sahib olduqlarını iddia edib. Netanyahu “silahsızlaşdırma bütün silahların götürülməsi və yüzlərlə kilometr uzunluğunda tunellərin məhv edilməsi deməkdir” deyə bildirib.
İsrailin 13-cü kanalının məlumatına görə, Netanyahu bu rəqəmləri ABŞ prezidenti Donald Tramp ilə də bölüşüb.
HƏMAS mənbələri isə Netanyahunun açıqlamalarını ABŞ tərəfinə siyasi təzyiq göstərmək cəhdi kimi qiymətləndirərək qeyd ediblər ki, İsrail yüngül silah anlayışını genişləndirərək müqaviməti hətta şəxsi silahlardan belə məhrum etmək istəyir. Onların fikrincə, bütün silahların təhvil verilməsində israr Qəzzanı müqavimət imkanlarından tam məhrum edilmiş əraziyə çevirmək məqsədi daşıyır.
Silahsızlaşdırma məsələsinə münasibətdə HƏMAS mənbələri bildiriblər ki, bu mövzu vasitəçilərlə müzakirə olunur və silah məsələsi üzrə ümumfələstin milli konsensusuna əsaslanan variantlar nəzərdən keçirilir. Tunellərlə bağlı məsələ də danışıqların predmetidir və hərəkat atəşkəsin ikinci mərhələsinə keçidi əngəlləmək niyyətində olmadığını, lakin bunun fələstinlilərin əsas mövqeləri hesabına baş verməyəcəyini vurğulayıb.
Bu arada İsrailin Yedioth Ahronoth qəzeti yazıb ki, İsrail ordusunun Baş Qərargah rəisi Eyal Zamir beynəlxalq sabitləşdirmə qüvvələrinin HƏMAS-ı silahsızlaşdırmaq gücünə şübhə etdiyini və ordunun bu məqsədlə yeni hərbi əməliyyata hazır olduğunu bildirib. Qəzetin məlumatına görə, müharibənin başa çatmasına baxmayaraq, İsrail ordusu Qəzza zolağında yeni tunellər aşkar etməyə davam edir.