BAKI, AzerVoice, Fərid Mikayılov

Yeni aparılan araşdırma Ozempic və Wegovy kimi məşhur arıqlama dərmanlarının istifadəsi ilə bağlı narahatedici nəticələr ortaya qoyub. Analizə görə, bu preparatlardan istifadə edənlərin 52 faizi 12 ay ərzində müalicəni dayandırır.

Danimarkada aparılan tədqiqat çərçivəsində artıq çəkidən əziyyət çəkən, lakin şəkərli diabeti olmayan 77 mindən çox şəxsin məlumatları araşdırılıb.

Nəticələr göstərib ki:

• İstifadəçilərin 18 faizi ilk 3 ayda,
• 31 faizi 6 ayda,
• 42 faizi isə 9 ay ərzində müalicəni yarımçıq saxlayıb.

Mütəxəssislərin açıqlamasına görə, dərmanı daha çox gənclər, kişilər, aşağı gəlirli bölgələrdə yaşayanlar, xroniki xəstəlikləri olanlar və əvvəllər psixoloji və ya mədə-bağırsaq dərmanları qəbul edənlər dayandırır. Ən çox rast gəlinən səbəblər arasında ürəkbulanma və qusma kimi yan təsirlər qeyd olunur.

Məlum olub ki, 30 yaşdan aşağı şəxslərin müalicəni dayandırma ehtimalı 45–59 yaşlılarla müqayisədə 48 faiz daha yüksəkdir. Aşağı gəlirli bölgələrdə yaşayanlarda bu göstərici imkanlı bölgələrlə müqayisədə 14 faiz artıqdır.

Dərmanların baha olması da əsas maneələrdən biri kimi göstərilir. Danimarkada Ozempic-in 1 aylıq istifadəsi 313 avroya qədər yüksəlir. Almaniyada isə bu məbləğ təxminən 120 avrodur.