BAKI, AzerVoice

NASA-nın Perseverance roveri Qırmızı Planetin keçmişi ilə bağlı mühüm ipuçlarını üzə çıxarıb.

AzerVoice xəbər verir ki, Qırmızı Planetin Jezero kraterində aparılan lazer analizləri nəticəsində qayaların tərkibində isti və rütubətli şəraitdə əmələ gələ biləcək minerallar aşkar edilib.

ABŞ-ın Purdue Universitetindən planetşünas Rocer Wiens bildirib ki, bu cür minerallar Yerdə əsasən isti iqlimlərdə və ya hidrotermal sistemlərdə formalaşır. Onun sözlərinə görə, qayaların uzun müddət axan suyun təsirinə məruz qalması nəticəsində müəyyən elementlər yuyulub, yalnız davamlı minerallar qalıb.

Perseverance roveri Laser Stimulated Dissociation Spectroscopy texnologiyasından istifadə edərək süxurların tərkibini analiz edib. Aparılan araşdırmalar qayaların əsasən "kaolinit" adlı yumşaq gil mineralından ibarət olduğunu göstərib. Bununla yanaşı, alimlər qayalarda maqnezium-alüminium tərkibli "spinel" mineralının izlərini də aşkar ediblər.

Tədqiqatçılar bu kəşfin Marsın keçmişdə düşündüyümüzdən daha isti və rütubətli bir mühitə sahib olduğuna dair mühüm dəlillər verdiyini bildirirlər. Bunun Qırmızı Planetdə həyatın mümkün olub-olmadığını araşdırmaq baxımından mühüm nəticələrə gətirib çıxara biləcəyi vurğulanır.