BAKI,AzerVoice
Toronto şəhərində fəaliyyət göstərən diyetoloq Abby Langer bildirir ki, ac qarına məşq etməyin performansı artırdığı və ya daha çox kalori yandırdığı iddiaları geniş yayılmış yanlış düşüncədir.
"Aparılan araşdırmalar göstərir ki, nəticə baxımından heç bir ciddi fərq yaranmır",- deyə Abby Langer bildirib.
Məşqdən əvvəl, məşqdən sonra və hətta məşq zamanı nə vaxt və necə qidalanmalı olduğunuza ümumi bir nəzər yetirək, unutmayın ki, mütəxəssislər nə vaxt yediyinizdən daha çox nə yediyinizin vacib olduğuna diqqət çəkirlər.
Qidaların tərkibindəki kalorilər sözün həqiqi mənasında enerjidir, buna görə də vücudunuzun düzgün məşq etməsi üçün enerjiyə ehtiyacı var. Amma məşqdən dərhal əvvəl çox yemək problemlərə səbəb ola bilər.
Langer qeyd edir ki, məşq zamanı qan axını mədə daxil olmaqla digər orqanlardan əzələlərə doğru yönəlir. Bu səbəbdən, tox qarına məşq etmək həzm prosesinə təsir edərək mədə spazmlarına, hətta özünüzü pis hiss etməyinizə səbəb ola bilər.
Bu vəziyyət xüsusilə yağ, protein və liflə zəngin yeməklərə aiddir, çünki onların həzmi karbohidratlardan daha uzun çəkir. Langer məşqdən əvvəl yüksək karbohidratlı qidalar qəbul etməyi və məşqdən əvvəl ən az iki-üç saat gözləməyi tövsiyə edir.
Əgər səhər tezdən və ya şam yeməyindən öncə məşq edirsinizsə, məşqdən öncə banan və fıstıq əzməsi və ya meyvəli qatıq kimi karbohidratla zəngin bir qəlyanaltı yeyə bilərsiniz.
Bu, məşq zamanı performansınızı artıracaq və məşqdən sonra da tam yeməklə enerji ehtiyacınızı ödəməyinizə şərait yaradacaq.
Amerikalı fizioloq Krista Austin qeyd edir ki, steyk kimi yüksək proteinli qidaların məşqdən sonra qəbul edilməsi daha faydalıdır, çünki həmin vaxt protein daha asan həzm olunur.
Əgər məşqdən sonra yemək yeməyinizə hələ bir saat və ya daha çox zaman varsa, bu müddətdə aclığınızı yatırtmaq üçün yüksək proteinli atıştırmalıq qəbul etmək daha yaxşı olacaq.
Bunun əsas səbəbi əzələlərin bərpası və ya qida maddələrinin mənimsənilməsi ilə əlaqəli deyil. Əksinə, çox ac olan insanlar adətən daha qeyri-sağlam yemək seçimləri edə bilirlər.
Langer, məşqdən sonra dərhal protein kokteyli içmək məcburiyyətində olduğunuz barədə də başqa bir əfsanəni qeyd edir.
Bir çox idman həvəskarı, məşqdən sonra təxminən bir saatlıq "anabolik pəncərə" deyilən dövrün əzələlərin bərpası üçün ən vacib olduğunu iddia edir.
Langer isə qeyd edir ki, orta statistik insanlar üçün bu müddət daha uzun bir dövrü əhatə edir. Yəni, hər yeməkdə müəyyən miqdarda protein qəbul etmək bu qısa zaman pəncərəsinə diqqət etməkdən daha vacibdir.
Vücudun əzələlərin bərpası və qorunması üçün davamlı olaraq amin turşularına (proteinlərə) ehtiyacı olduğunu deyən Langer qeyd edir ki, hər yeməkdə təxminən 25-30 qram protein qəbul etmək kifayətdir.