BAKI,VOA, Orxan Qədirzadə
Bu gün dünya tarixində mühüm hadisələrdən biri – Roma şəhərinin əsasının qoyulması günü kimi qeyd olunur.
Rəvayətlərə görə, Romul və onun əkiz qardaşı Rem eramızdan əvvəl 753-cü ilin 21 aprelində Roma şəhərinin əsasını qoyublar. Bu tarix qədim Roma alimi Mark Terentsi Varro tərəfindən müəyyən edilib və tarixşünaslıqda geniş qəbul olunub.
Rəvayətə əsasən, Romul və Rem Alba Lonqa şəhərinin hökmdarı Numitorun nəvələri idi. Onların anası Rea Silvia hakimiyyət uğrunda mübarizənin qurbanı olaraq məcburi şəkildə rahibə həyatına sürüklənsə də, müharibə tanrısı Mars ilə əlaqəsindən sonra əkizləri dünyaya gətirib. Körpələr Tiber çayına atılsa da, möcüzəvi şəkildə xilas olaraq Palatin təpəsi yaxınlığında sahilə çıxıb və bir dişi canavar tərəfindən bəsləniblər. Daha sonra çoban Faustul tərəfindən tapılan əkizlər böyüyərək güclü liderlərə çevriliblər. Onlar əsl mənşələrini öyrəndikdən sonra Alba Lonqaya qayıdaraq Amuliusu devirmiş və babaları Numitoru yenidən taxta çıxarmışdılar. Bundan sonra isə xilas olduqları ərazidə yeni şəhər salmaq qərarına gəliblər. Lakin qardaşlar arasında yaranan mübahisə faciə ilə nəticələnib və Rem Romul tərəfindən öldürülüb. Bununla da Romul yeni şəhərin yeganə hökmdarı olub və şəhər onun adı ilə – Roma adlandırılıb.
Əhalinin artırılması məqsədilə Romul qaçqın və sürgünlərə sığınacaq verib. Qadın çatışmazlığı problemi isə qonşu Sabin tayfalarının qadınlarının qaçırılması ilə həll olunmağa çalışılıb. Bu hadisə müharibəyə səbəb olsa da, sonradan sülh əldə olunub və Roma Sabin hökmdarı Titus Tatius ilə birgə idarə olunub.
Romulun ölümündən sonra onun ilahiləşdirildiyi və Quirinus kimi sitayiş edildiyi qeyd olunur. Sonrakı dövrdə Roma yeddi hökmdar tərəfindən idarə olunub və eramızdan əvvəl 509-cu ildə respublika idarəetmə formasına keçid baş verib.
Roma ilə bağlı digər əfsanələrdə isə şəhərin mənşəyi Troya qəhrəmanı Eney ilə əlaqələndirilir. Bu rəvayət qədim yunan şairi Homer və daha sonra Roma şairi Vergili tərəfindən inkişaf etdirilərək geniş yayılıb. Eneyin nəslindən gəldiyi iddia edilən Yuli Sezar və Avqust kimi fiqurlar bu mifoloji əlaqəni siyasi legitimlik vasitəsinə çeviriblər.