BAKI, VOA, Orxan Qədirzadə
1945-ci il martın 22-də Misirin paytaxtı Qahirədə regionun yeddi aparıcı dövlətinin nümayəndələri bir araya gələrək müasir tarixin ən mühüm regional təşkilatlarından biri olan Ərəb Dövlətləri Liqasını təsis ediblər.
Təşkilatın əsasını Misir, Suriya, Livan, Transiordaniya (hazırkı İordaniya), Səudiyyə Ərəbistanı, İraq və Yəmən qoyub. Regionda iqtisadi artımı stimullaşdırmaq, üzv dövlətlər arasındakı mübahisələri həll etmək və siyasi hədəfləri koordinasiya etmək məqsədilə yaradılan Liqa, hər bir dövlətin bir səs hüququna malik olduğu xüsusi şura formatında fəaliyyətə başlayıb.
Sonrakı illərdə daha 15 ərəb ölkəsinin qoşulması ilə genişlənən təşkilat, 1965-ci ildə vahid bazarın yaradılması ilə iqtisadi inteqrasiyada mühüm addım atıb. Hazırda Ərəb Dövlətləri Liqası Yaxın Şərq və Şimali Afrikada siyasi iradənin formalaşmasında və regional təhlükəsizliyin qorunmasında həlledici platforma rolunu oynamağa davam edir.