Türkiyənin halal turizm sertifikatlaşdırmasında aparıcı qurum olan Türk Standartları İnstitutunun (TSİ) fəaliyyəti ölkənin bu sahədəki potensialını gücləndirməyə imkan verəcək.
TSİ 2013-cü ildən bu yana "halal sertifikatlaşdırma" fəaliyyətini həyata keçirir. Son vaxtlara qədər halal qida, kosmetika, təmizləyici məhsullar və dezinfeksiyaedici maddələr sahəsində sertifikatlaşdırma həyata keçirən İnstitut 2023-cü ilin yanvar ayından etibarən halal turizm sahəsində də xidmət göstərməyə başlayıb.
Halal Akkreditasiya Qurumu (HAQ) tərəfindən akkreditə olunmuş İnstitut turizm sahəsində müəyyən edilmiş standartlar çərçivəsində halal sertifikatları verir. Bu günə kimi turizm sahəsindəki meyarlara cavab verən 4 sahibkar sözügedən sertifikatı almaq hüququ qazanıb.
TSİ halal sertifikatlaşdırma fəaliyyətini İslam Ölkələri Standartları və Metrologiya İnstitutunun (SMIIC) standartlarına uyğun olaraq həyata keçirir. SMIIC tərəfindən nəşr olunan standartlar İnstitut tərəfindən milli standartlar kimi uyğunlaşdırılır və nəşr olunur.
TSİ halal qida və kosmetika sahəsləri ilə yanaşı halal turizm sahəsində də SMIIC standartlarına uyğun olaraq HAQ tərəfindən akkreditə olunmuş ilk sertifikatlaşdırma orqanı sayılır.
Namazdan tutmuş məscidə qədər meyarlar var.
Müəssisələrin TSİ-nin halal turizm sertifikatını ala bilməsi üçün üç kateqoriyada standartlara cavab verməsi lazımdır.
Mətbəx, restoran, qida və yeməklərin “halal” meyarlarına uyğun olması tələb olunur. Bundan əlavə, ibadət yeri və məscidin olması, Ramazan ayında iftar və sahur üçün uyğun yemək vaxtlarının proqramlaşdırılması, hovuz, SPA və hamam xidmətləri üçün qadınlar və kişilər üçün bir-birindən ayrı məkanların təşkil edilməsi tələb olunur.
Otaqlarda qiblə səmtinin, səccadənin olması, tualetlərdə təharət təsisatının qurulması, tələb olunduqda Qurani-Kərim təmin edilməsi, təmizlik materiallarının tələblərə cavab verməsi vacibdir.
Həmçinin meyarlar arasında mini soyuducularda spirtli içkilərin qoyulmaması, otaqlarda insan və ya heyvan fiqurları olan şəkillərin olmaması, gecə klubları kimi məkanların yer almaması kimi tələblər də mövcuddur.
Malayziya, Türkiyə və Birləşmiş Ərəb Əmirlikləri halal turizm bazarında lider ölkələr kimi seçilir. Son zamanlar Səudiyyə Ərəbistanı, Qətər, İndoneziya, İordaniya və Mərakeş də atdıqları addımlarla diqqət çəkirlər.
