BAKI, AzerVoice

"TikTok" platformasının mütəxəssisləri ABŞ-da platformanın bloklanması ehtimalı ilə bağlı yeni bir tətbiq üzərində işləyirlər.

AzerVoice xəbər verir ki, bu barədə “The Information” portalı mənbələrə istinadən məlumat verib.

Məlumata görə, bu yeni tətbiq hələlik "M2" adını daşıyır və onu 5 sentyabr tarixində ABŞ-ın tətbiq mağazalarında yerləşdirmək planlaşdırılır.

Xatırladaq ki, ABŞ prezidenti Donald Tramp iyunun 29-da "Fox News"-a verdiyi müsahibədə "bir qrup çox zəngin insanın" "TikTok"u "ByteDance" şirkətindən almağa hazır olduğunu bildirib. Tramp qeyd edib ki, bu investorların kimliyini təxminən iki həftəyə açıqlayacaq. Çin səfirliyinin ABŞ-dakı mətbuat katibi Liu Penuy isə bildirib ki, Pekin "TikTok" ilə bağlı məsələlərdə Çin Xalq Respublikasının qanun və qaydalarına uyğun hərəkət edəcək.

Tramp iyunun 19-da ABŞ-da TikTok-un bloklanması qərarını 90 gün, yəni sentyabrın 17-ə qədər təxirə saldığını açıqlayıb. Artıq təxminən beş ay keçib ki, ABŞ-da qüvvəyə minmiş qanuna əsasən, əgər ana şirkət "ByteDance" "TikTok"u satmasa, tətbiq ölkədə qadağan olunacaq. Tramp prezident kimi fəaliyyətə başladıqdan sonra imzaladığı fərmanla "TikTok"un bloklanmasını azı 75 gün ertələmişdi. O həmçinin bəyan etmişdi ki, Birləşmiş Ştatlar "TikTok"un yarısına sahib olmaq hüququna malik olmalıdır, lakin bu fikrin nəyə əsaslandığını izah etməmişdi.