BAKI,AzerVoice

Zəkat -sözün lüğəvi mənasında təmizlənmə, artma, bolluq, inkişaf deməkdir. İslam hüququnda isə zəkat, maddi imkanı olan müsəlmanların öz sərvətlərinin müəyyən hissəsini Quranda göstərilən hüquq sahiblərinə verməsi deməkdir.

İslam dininin əsas vacibatlarından biri olan zəkat cəmiyyətdə sosial tarazlığın, iqtisadi sabitliyin və sosial həmrəyliyin təmin olunmasında mühüm rol oynayır. Zəkat ibadətinin əsas məqsədi varlı və kasıb təbəqələr arasında yaranan iqtisadi uçurumu aradan qaldırmaq, qarşılıqlı etimadı və yaxınlığı artırmaqdır.

Zəkat varlı ilə kasıb arasında körpü rolunu oynayır, cəmiyyətdə sosial ədalətin möhkəmlənməsinə xidmət edir, kasıbların zənginlərə qarşı narazılığını aradan qaldırır və iqtisadi harmoniyanı gücləndirir.

İslamda zəkat yalnız puldan ibarət deyil. Qızıl, gümüş, taxıl, meyvə, mədən gəlirləri, nəqliyyat, kirayə və iş yeri gəlirləri də daxil olmaqla, gəlir gətirən bütün sərvətlərdən zəkat verilir.

Qurani-Kərimdə zəkatın kimlərə verilməsi açıq şəkildə göstərilmişdir:

“Sədəqələr (zəkatlar) Allah tərəfindən bir fərz olaraq yalnız yoxsullara, miskinlərə, (zəkat toplayan) işçilərə, qəlbləri İslama isidiləcək kimsələrə, azad olmaq istəyən kölələrə, borclulara, Allah yolunda olanlara və yolda qalanlara verilir. Allah hər şeyi biləndir, hikmət sahibidir.”
(Qurani-Kərim, 9:60)