Türkiyə Milli Kəşfiyyat Xidmətinin rəhbəri İbrahim Kalın Tripolidə Liviya Prezident Şurasının sədri Məhəmməd əl-Menfi ilə görüşüb. Prezident Şurasından verilən məlumata görə, görüş zamanı Kalın Türkiyə Prezidenti Rəcəb Tayyib Ərdoğanın salamlarını Menfiyə çatdırıb. Görüşdə Türkiyə-Liviya münasibətləri ilə yanaşı, yerli və regional məsələlər müzakirə olunub. Tərəflər Liviyanın sabitliyinin regional təhlükəsizlik üçün əsas amil olduğunu vurğulayıb və bu istiqamətdə iki ölkə arasında məsləhətləşmələrin davam etdirilməsinin vacibliyini qeyd ediblər.

İstanbulda OnlyFans platformasında əxlaqsız məzmun paylaşan şəxslərə qarşı əməliyyat keçirilib. Əməliyyat zamanı 16 şübhəli saxlanılıb, onlara məxsus 2 şirkət, 10 daşınmaz əmlak və 14 nəqliyyat vasitəsi üzərinə həbs qoyulub. İstanbul Polis İdarəsinin Kibercinayətkarlıqla Mübarizə Şöbəsinin əməkdaşları İstanbul Baş Prokurorluğunun koordinasiyası ilə “Cinayət yolu ilə əldə edilmiş gəlirlərin leqallaşdırılması” və “Əxlaqsızlıq” maddələri üzrə araşdırmaya başlayıblar.

Türkiyənin Daxili Təhlükəsizlik Qüvvələri Baş Komandanlığı 12 vilayətdə 15 mütəşəkkil cinayətkar qrupa qarşı keçirilən əməliyyatlar zamanı hesablarında 438 milyon lirə maliyyə hərəkəti qeydə alınan 109 şübhəlinin saxlanıldığını açıqlayıb. Qurumdan verilən məlumata görə, Türkiyə Respublika Baş Prokurorluqları və Qaçaqmalçılıq və Mütəşəkkil Cinayətkarlıqla Mübarizə, eləcə də Kiber Cinayətlərlə Mübarizə idarələrinin koordinasiyası ilə vilayət təhlükəsizlik qüvvələri tərəfindən 12 vilayətdə əməliyyatlar həyata keçirilib.

Türkiyə Prezidenti Rəcəb Tayyib Ərdoğan Ankarada serbiyalı həmkarı Aleksandr Vuçiç ilə keçirdiyi mətbuat konfransında Türkiyənin Balkan regionuna verdiyi önəmi bir daha diqqətə çatdırıb. Dövlət başçısı Türkiyənin regionda sülh və sabitliyin qarantı rolunda çıxış etməyə davam edəcəyini vurğulayıb. Ərdoğan Türkiyə və Serbiya arasındakı münasibətləri "qızıl dövr" kimi xarakterizə edərək, iqtisadi göstəricilərin bu dostluğun ən bariz nümunəsi olduğunu qeyd edib.

Türkiyə Prezidenti Rəcəb Tayyib Ərdoğan ölkədə rəsmi səfərdə olan Serbiya Prezidenti Aleksandr Vuçiç ilə paytaxt Ankarada bir araya gəlib. Rəsmi qarşılanma mərasimindən sonra dövlət başçıları əvvəlcə təkbətək, daha sonra isə nümayəndə heyətlərinin iştirakı ilə geniş tərkibli görüş keçiriblər. Görüşlər zamanı Türkiyə və Serbiya arasındakı ikitərəfli münasibətlərin mövcud vəziyyəti, iqtisadi-ticari əlaqələrin genişləndirilməsi və regional təhlükəsizlik məsələləri müzakirə olunub.

Türkiyənin xarici işlər naziri Hakan Fidan ABŞ və İranın nüvə sazişi ilə bağlı danışıqlarda qarşılıqlı çeviklik göstərdiyini, Vaşinqtonun artıq müəyyən hüdudlar daxilində uranın zənginləşdirilməsinə dözümlü yanaşmağa hazır olduğunu bəyan edib. Nazir qeyd edib ki, tərəflər bir-birinin qırmızı xətlərini və imkan hədlərini daha yaxşı anlamağa başlayıblar.

Milyarder Ceffri Epşteynin deşifrə olunmuş yazışmalarında Türkiyə əleyhinə fəaliyyətlərlə yanaşı, Milli Kəşfiyyat Təşkilatının (MİT) Suriyadakı kəşfiyyat uğuru barədə detallar üzə çıxıb. ABŞ-ın milyonlarla dollar xərcləyərək hazırladığı 50 nəfərlik xüsusi hərbi qrup sahəyə enən kimi MİT-in müdaxiləsi ilə dağıdılıb. Bu faktlar məşhur dilşünas Noam Çomski ilə Epşteyn arasındakı 28 sentyabr 2015-ci il tarixli e-poçt yazışmalarında yer alıb.

Türkiyə Prezidenti Rəcəb Tayyib Ərdoğan müxalifətin son davranışlarını kəskin tənqid edərək, hakim partiyanın və Cumhur İttifaqının ölkədə siyasi sabitliyin əsas dayağı olduğunu bildirib. Ərdoğan qlobal geosiyasi qeyri-müəyyənliklərin artdığı bir dövrdə Türkiyənin sabitliyinin məhz mövcud siyasi ittifaqla təmin olunduğunu bildirib. Onun sözlərinə görə, beynəlxalq sistemdə qaydalar dəyişir, yeni böhranlar yaranır və belə şəraitdə təcrübəli və peşəkar kadrların idarəçilikdə olması mühüm əhəmiyyət daşıyır.

Türkiyə Milli Müdafiə Nazirliyi Suriyada son vəziyyətlə bağlı açıqlama yayıb. Nazirlikdə keçirilən həftəlik brifinqdə bildirilib ki, 30 yanvar tarixində Suriya hökuməti ilə SDQ arasında imzalanmış razılaşmanın icrası sahədə yaxından izlənilir. “Suriya Hökuməti ilə SDQ arasında 30 yanvarda imzalanan razılaşmanın tətbiqini sahədə diqqətlə izləməyə davam edirik.” - deyə rəsmi açıqlamada qeyd olunub.

Türkiyə Prezidenti Rəcəb Tayyib Ərdoğan İslam Əməkdaşlıq Təşkilatının Nəqliyyat Nazirləri Toplantısına videomüraciət ünvanlayaraq, üzv ölkələr arasında nəqliyyat əlaqələrinin gücləndirilməsinin vacibliyini vurğulayıb. Ərdoğan bildirib ki, coğrafi məsafələrin əvvəlki əhəmiyyətini itirdiyi, lakin strateji bağlantıların daha da dəyər qazandığı bir dövrdə İslam dünyasının böyük potensialı mövcuddur. Onun sözlərinə görə, bu potensialdan tam istifadə etmək və coğrafi üstünlükləri strateji gücə çevirmək üçün effektiv, etibarlı və inteqrə olunmuş nəqliyyat şəbəkələri zəruridir.

Sudan Ordusunun arsenalında yer alan "Bayraktar AKINCI" Hücum Tipli Pilotsuz Uçuş Aparatı Cənubi Kurdufan yaxınlığında keçirilən əməliyyatda strateji uğura imza atıb. Əməliyyat zamanı Çevik Dəstək Qüvvələrinə (RSF) məxsus Çin istehsalı olan "FK-2000" Hava Hücumundan Müdafiə Sistemi ROKETSAN mühimmatı ilə vurularaq sıradan çıxarılıb. Qeyd edək ki, "FK-2000" sistemi Rusiyanın "Pantsir" kompleksinə bənzər imkanları ilə tanınır və həm zenit toplarına, həm də yer-hava tipli raketlərə sahibdir.

Konstitusiyanın 106-cı maddəsinə uyğun olaraq keçirilən andiçmə mərasimi gərgin anlarla yadda qalıb. Ədliyyə naziri Akın Gürlek and içmək üçün kürsüyə dəvət olunduğu zaman Cümhuriyyət Xalq Partiyasının (CHP) millət vəkilləri kürsüyə doğru yürüş edərək andiçməyə mane olmağa çalışıblar. Müxalifət qrupunun bu addımı parlamentdə gərginliyi pik həddə çatdırıb.